DILI, 16 dezembru 2024 (TATOLI)—Ekipa husi Sekretariadu Tékniku Administrasaun Eleitorál (STAE) hahú ohin la atende eleitór bainhira atu atualiza kartaun eleitorál (biométriku).
“Atu fó hatene ba eleitór sira katak, hahú ohin loron 16 dezembru, STAE sei la halo atendimentu ba eleitór sira-ne’ebé atu rejistu no atualiza kartaun eleitorál tanba STAE sei halo ajustamentu ba aldeia no suku foun iha sistema,” Diretora Nasionál Teknolojia no Informasaun iha STAE, Tulia de Andrade, informa ba Agência Tatoli, via telefónika, segunda ne’e.
Atendimentu sei hahú filafali iha loron 06 janeiru 2025, iha ida-idak ninia munisípiu no unidade jeografika eleitór sira.
Notísia relevante : Sidadaun rihun 2-resin iha Covalima atualiza ona kartaun eleitorál ba biométriku
Eleitór ne’ebé eziste daudaun ne’e 924.959, kompostu husi mane 480.552 no feto 444.407. Atualizasaun sira hamutuk 56.062 (6,06%), kompostu husi mane 28.384 no feto 27.678, ba prominente hamutuk 868.897 (93,94%), kompostu husi mane 452.168 no feto 729.
Aleinde ne’e iha mós eleitór ne’ebé rejistu foun hamutuk 4.830, kompostu husi mane 2.236 no feto 2.594, nune’e totál eleitór hamutuk 60.892 iha territóriu tomak
Jornalista : Osória Marques
Editora : Julia Chatarina