COVALIMA, 12 Dezembru 2024 (TATOLI) – Sekretariadu Tékniku Administrasaun Eleitorál (STAE) Covalima prodús ona kartaun eleitorál biométriku rihun 2.284 ba eleitór sira.
“Ita halo atendimentu ba sidadaun sira atualiza sira-nia kartaun eleitorál hahú iha Novembru tinan ne’e, ne’ebé ami konsege atende ona eleitór 2.284 mak troka ona sira-nia kartaun eleitorál hodi uza fali kartaun eleitorál biométriku”, Diretór STAE Covalima, Francisco Gusmão, relata dadus ne’e iha Camnasa.
Nia dehan eleitór rihun 2- resin ne’e mai husi postu administrativu hitu, maibé tuir dadus, maioria eleitór sira husi postu administrativu Suai, tanba sira hela besik iha vila.
Dirijente ne’e dehan STAE Covalima sei konsentra de’it atendimentu iha edifísiu STAE nian no seidauk bele halo atendimentu iha postu administrativu sira tanba depende ba sistema.
“Ita iha planu atu halo atendimentu ba eleitór sira atualiza kartaun eleitorál iha postu administrativu sira, bainhira aumenta tan ita-nia sistema, nune’e halo atendimentu ho rotasaun iha postu sira bazeia ba oráriu”, nia informa.
Sistema atendimentu bazeia ba loron serbisu husi segunda to’o sesta hahú tuku 08:00 to’o 5:30 no daudaun ne’e STAE atende, kada loron, eleitór 100-resin, maibé depende mós ba eleitór sira.
Sidadaun Bosco Amaral hateten katak kartaun biométriku ida-ne’e di’ak liu kompara ho ida uluk, tanba bainhira atu bá vota la presiza atu rejista, maibé haree de’it iha sistema.
“Kartaun biométriku ida ne’e bainhira ita bá vota fiskál sira la presiza hakerek ona eleitór sira-nia naran, maibé leno de’it iha sistema, nune’e fasilita eleitór sira la presiza atu forma naruk bainhira atu ezerse direitu votu”, dehan.
Notísia relevante: STAE Covalima prodús ona kartaun biométriku 200-resin ba sidadaun sira
Jornalista: Celestina Teles
Editora: Maria Auxiliadora
