DILI, 16 dezembru 2024 (TATOLI)—Diresaun Nasionál Ensinu Rekorrente husi Ministériu Edukasaun (ME) atribui ona sertifikadu ba estudante hamutuk 183, kompostu husi mane 70 no feto 33 husi Ensinu Rekorrente.
“Ida-ne’e ba ita-nia estudante iha terseiru siklu iha Sentru Komunitáriu Aprendizajen Cristo Rei nian. Estudante sira-ne’e asesu iha salaun Asosiasaun Defisiénsia Timor-Leste (ADTL),” Koordenadór Sentru Komunitáriu Aprendizajen Cristo Rei Creativo, Francisco Maria, informa iha aldeia sentru Bedois, Becora, segunda ne’e.
Estudante ema ho defisiénsia iha Sentru Clack Fuik no Camea Cadabunak no estudante sira ne’e pasa hotu.
“Ita-nia estudante na’in-tolu mak hetan mellór klasifikasaun, feto rua no mane ida. Sira-ne’e husi Sentru Komunitáriu Aprendizajen Cristo Rei Kreativu,” nia akresenta.
Notísia relevante : KNTLU-Ministériu Edukasaun inaugura Sentru Komunitáriu Aprendizajen tolu
Aleinde ne’e, Diresaun Nasionál Ensinu Rekorrente atribui sertifikadu kursu lian portugés, koreia no inglés ba estudante hamutuk 133.
Sentru Komunitáriu Aprendizajen Cristo Rei halo mós sensibilizasaun ba programa ekivalénsia Alfanamor no abilidade vida ba tinan 2024-2025.
Númeru alunu finalista iha tinan letivu 2024 hamutuk na’in-55.661, kompostu husi Ensinu Báziku na’in-28.216, Ensinu Sekundáriu Jerál na’in-23.661, Ensinu Sekundáriu Tékniku Vokasionál na’in-3.733 no Ensinu Rekorrente na’in-364.
Husi totál estudante, husi Ensinu Báziku ne’ebé la tuir ezame nasionál hamutuk na’in-262, Ensinu Sekundáriu Jerál iha na’in-339, Ensinu Sekundáriu Tékniku Vokasionál iha na’in-51 no Ensinu Rekorrente iha na’in-27.
Jornalista : Osória Marques
Editora : Julia Chatarina
