DILI, 17 dezembru 2024 (TATOLI)–Ministra Edukasaun, Dulce de Jesus Soares, hateten, Ministériu Edukasaun (ME) planeia prodús uniforme eskolár ne’ebé ho presesu asesível iha territóriu tomak.
“Uniforme ne’e buka kór ne’ebé ho presu barratu hodi hafasil inan-aman sira atu sosa. Ezemplu farda kamizola mutin atu fásil liu inan-aman sira sosa iha fatin ne’ebé de’it, tanba ita-nia rain ne’e oinsá para sosa hena ho barratu. Entaun, kuandu ita lansa ne’e fiar katak sei la sai todan ida ba inan-man sira,” Ministra hateten iha salaun ME, Vila-Verde, tersa ne’e.
ME públika sai uniforme eskolár iha tinan oin, nune’e eskola sira bele prepara ba anu letivu foun maibé sei la afeta ba prosesu aprendizajen hanesan tinan hirak liubá.
Diretór Eskola Ensinu Sekundáriu Jerál 05 de Maio Becora, Gasmiro Dias Marques, hateten, ME tenke aselera uniforme eskolár tanba to’o agora estudante ba anu letivu foun ne’e laiha uniforme.
“Uniforme eskolár ne’e to’o agora ita seidauk prodús tanba desizaun husi Ministériu Edukasaun katak labele prodús ka haruka estudante sira suku lai farda foun hodi hein desizaun foun husi Governu ba modelu farda ida de’it ba eskola sira iha territóriu tomak. Tanba ne’e mak ami la haruka estudante foun sira suku farda ne’e, kleur loos ona entaun ita husu ba Ministériu Edukasaun atu aselera lalais ona tanba estudante foun sira to’o agora laiha uniforme,” Diretór dehan.
Notísia relevante : Uniforme eskolár hahú implementa iha 2025
Diretór haktuir, eskola sira ezije atu aselera uniforme eskolár tanba atu tama fali ona ba anu letivu foun maibé estudante foun sira mai nafatin ho faru mutin no kalsa metan, nune’e diferente ho estudante tuan sira.
“Ita hein desizaun husi Ministériu Edukasaun mak foin bele, maibé to’o agora ita hein no tama ona ba anu letivu foun mós ita-nia oan sira nafatin mai ho faru mutin no kalsa metan, entaun sira ketak loos ho estudante tuan sira ne’ebé iha nanis ona farda molok Ministériu Edukasaun hasai sirkulár,” nia tenik.
Jornalista : Osória Marques
Editora : Julia Chatarina
