DILI, 09 dezembru 2024 (TATOLI) – Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lopes Lemos, hateten, uniforme eskolár hahú implementa iha tinan-2025. Uniforme hein implementa de’it ona tanba nia prosesu loos hotu ona no hein publika iha Jornál da Repúblika no garante katak iha anu letivu mai ne’e.
“Kona-ba uniforme eskolár ne’e hein públika iha Jornál da Repúblika no ita garante estudante sira bele utiliza iha tinan oin. Maibé kona-ba nia kór ne’e ita simples hela mutin-metan no kona-ba nia modelu ita hein iha Jornál Repúblika”, Sekretáriu Estadu dehan ba TATOLI, Vila Verde, Dili, segunda ne’e.
Notísia relevante:Implementasaun uniforme eskolár adia ba tinan oin
Kona-ba uniforme eskolár, tuir sirkulár Ministériu Edukasaun nian fó sai iha tinan kotuk katak nia mekanizmu no regra sira-ne’e sei sai husi diploma ida, iha artigu 14, bazea ba dekretu-lei númeru 32, 33, 34, ho rejime jurídiku sistema nasionál edukativu nian.
Ida-ne’e tenke ho nia diploma ministeriál ida liuliu ba mekanizmu uzu, modelu, kór no kustu, atu nune’e labele prejudika tan inan-aman sira.
Notísia relevante:ME halo revizaun ba modelu no kor ba uniforme eskolár
Jornalista: Osória Marques
Editór: Rafael Ximenes de A. Belo
