DILI, 15 maiu 2023 (TATOLI) – Ministériu Edukasaun Juventude no Desportu (MEJD) adia planu atu suku uniforme eskolár ba alunu sira iha territóriu ba tinan oin tanba ministériu seidauk halo preparasaun di’ak.
Diretór-Jerál Edukasaun Ensinu, Luís da Costa Fernandes, afirma planu atu suku uniforme nasionál ba estudante sira ne’e hatuur ona iha dekretu-lei ne’ebé ko’alia kona-ba rejime jurídiku, maibé tanba ninia implementasaun maka tarde, nune’e ministériu deside ba fali tinan oin.
“Ita adia fali planu ba implementasaun suku uniforme nasionál ba estudante sira iha territóriu ba tinan oin tanba ita tarde ona, depois eskola barak maka suku tiha ona farda ba estudante sira. Ita sei diskute fali planu ne’e iha outubru tinan ne’e hodi fó tempu ba ministériu atu halo preparasaun di’ak liután hodi reforsa dekretu-lei sira ho adekuadu”, realsa.
Dirijente ne’e husu nafatin ba parte eskola sira hotu atu kontinua akompaña programa ministériu nian, nune’e bele hatene mudansa ruma. “Nune’e bele entende didi’ak saida maka ministériu prepara, liuliu ba implementasaun uniforme nasionál ne’e rasik”, katak.
Notísia relevante: MEJD sei foti medida ba eskola ne’ebé suku ona uniforme
Jornalista: Tomé Amado
Editora: Maria Auxiliadora
