MEJD sei foti medida ba eskola ne’ebé suku ona uniforme

DILI, 17 janeiru 2023 (TATOLI)–Ministru Edukasaun Juventude no Desportu (MEJD) Armindo Maia, hateten eskola sira-ne’ebé mak la kumpre sirkulár ne’ebé MEJD fó sai ona hodi bandu labele suku uniforme ba estudante sira iha tinan ida-ne’e, ministériu sei foti medida no sei hetan sansaun.

“Ita hasai ona sirkulár ba eskola hotu atu bandu eskola ho inan-aman sira labele suku uniforme ba estudante sira. Tanba, ministériu iha ona planu atu prepara modelu kór no motif uniforme nasionál ba eskola sira atu suku ba estudante sira,” Ministru Armindo Maia hateten ba jornalista sira iha eskola ensinu sekundáriu jerál 4 Stembru UNAMET Balide.

Eskola sira-ne’ebé mak simu tiha sirkulár hosi Ministériu Edukasaun maibé la kumpre no kontinua hamutuk ho inan-aman sira suku nafatin uniforme ba estudante sira, sei hetan sansaun ruma hosi MEJD.

“Sé mak la kumpre sirkulár ne’e ita sei foti medida ruma hasoru sira,” nia dehan.

Governante ne’e hateten, agora daudaun ministériu sei haree hela asuntu ida tuir ida-idak nia dalan no eskola sira-ne’ebé mak suku tiha ona uniforme ba estudante sira, ministériu sei buka meiu atu haruka fó fila-fali uniforme sira-ne’e ba eskola sira ka bele mós iha medida seluk tuir desizaun Ministériu nian.

Tanba, nia dehan, MEJD iha ona planu no preparasaun atu prepara uniforme nasionál ida ba estudante sira. modelu farda nasionál ho ninia kór no motif sira ne’e ministériu deside hotu ona.

Agora hein de’it no akompaña ho despaixu ministerial nian ida ba uniforme nasionál ne’e hodi bele fó kompeténsia ba eskola sira atu hamutuk ho inan-aman sira, atu hahú suku ona uniforme ba estudante sira.

“Ita prepara de’it ninia modelu kór no motif depois ita entrega ba eskola sira mak atu jere ho inan-aman sira hodi bele suku uniforme ne’e ba sira nia oan,” nia hateten.

Jornalista : Tomé Amado

Editór       : Cancio Ximenes