DILI, 17 dezembru 2024 (TATOLI) – Palásiu Prezidensiál liu husi Diretora Jerál Administrasaun Prezidénsia Repúblika, Aida Maria dos Santos ho ekipa fahe pakote Natál ba dadur na’in-150 iha Prizaun Gleno,munisípiu Ermera.
Jestu solidariedade ne’e hala’o tanba Prezidénte Repúblika, José Ramos-Horta estende ninia inisiativa anuál ho naran “Natál do Povo” (Natal Povu nian).
Programa Natál do Povo tinan ida ne’e inisia husi Prezidente Ramos-Horta, hetan apoiu husi Primeiru-Ministru liuhusi Vise-Primeiru-Ministru, Francisco Kalbuadi Lay.
Liuhusi nota ne’ebé Agência TATOLI asesu husi media Gabinete Palásiu Prezidensiál, Diretora-Jerál Aida Maria dos Santos hateten, importánsia atu mantein fiar, esperansa, no domin durante tempu dezafiante sira iha moris, partikularmente durante époka Natál nian.
“Pakote sira bele ho valór ki’ik, maibé lori Prezidente nia domin no ho intensaun atu apoia nesesidade báziku sira ba dadur sira,” Diretora ne’e tenik.
Atividade ne’e organiza husi Unidade Servisu Sosiedade Sivíl no Asuntu Sosiál, ne’ebé lidera husi Asesór Quintiliano Moniz, ne’ebé hato’o agradesimentu ba ekipa Prezidénsia nia prezensa.
Asesór Moniz destaka katak vizita ne’e nu’udar manifestasaun direta ida husi Prezidente Ramos-Horta nia kompromisu hodi hatudu kompaixaun no apoiu ba membru hotu-hotu husi sosiedade timoroan, inklui sira ne’ebé dadur hela.
Jestu signifikativu ida-ne’e kontinua Prezidente nia tradisaun hodi hakat ba komunidade sira ne’ebé vulneravel no habelar espíritu Natál nian iha Timor laran tomak, hodi hatudu katak kompaixaun laiha limite.
Jornalista: Hortencio Sanchez
Editór: Florencio Miranda Ximenes
