DILI, 20 Dezembru 2024 (TATOLI) – Governu Austrália, liuhusi Department of Foreign Affairs and Trade (DFAT) fó, dezde 2018, bolsa estudu ba membru Asosiasaun Defisiénsia Timor-Leste (ADTL) hamutuk na’in-ualu hodi bá estuda iha Austrália.
Diretór-Ezekutivu ADTL, Cesário da Silva, informa katak, antes dezloka bá Austrália, bolseiru sira tuir uluk formasaun dalen inglés iha Lorosa’e English Language Institute (LELI).
“Komesa ho ema na’in-ida iha 2018, agora ema lubuk ida iha ne’ebá hala’o sira-nia estudu. Kada tinan iha oportunidade ba ema ho defisiénsia na’in-rua”, dirijente ne’e dehan ba Tatoli iha ámbitu enkontru anuál ADTL, iha Mascarenhas, ohin.
Cesário da Silva dehan ema na’in-ualu ne’ebé estuda lisensiadu iha Austrália ne’e iha área diferente, entre seluk mak, dezenvolvimentu ekonómiku no estudu dezabilidade.
Dirijente ne’e adianta, aleinde bolsa estudu, iha mós programa formasaun lia-inglés ba ema ho defisiensia sira atu bá tuir iha Austrália. “Foin lalais sira na’in-lima bá formasaun lia-inglés durante fulan tolu iha ne’ebá [Australia], agora fila ona mai Timor-Leste”, nia hateten.
Diretór ne’e esplika katak ema ho defisiénsia ne’ebé hetan oportunidade bá tuir formasaun no bá estuda iha Austrália ne’e hetan selesaun ida ne’ebé rigoroza no bazeia ba sira-nia kapasidade iha dalen inglés.
Notísia relevante: ADTL hetan kontribuisaun rihun $120 hosi DFAT kada tinan
Jornalista: Jesuína Xavier
Editora: Maria Auxiliadora
