PM Xanana husu CCI-TL no KADIN hametin kooperasaun iha setór ekonómiku
DILI, 20 dezembru 2024 (TATOLI)—Prezidente Kámara Komérsiu Indústria Timor-Leste (CCI-TL) Jorge Manuel Serrano no Prezidente Kámara Komérsiu Indústria Indonézia (KADIN, sigla indonéziu), Arsjad Rasjid, ho komitiva, hasoru malu ho Primeiru-Ministru (PM), Kay Rala Xanana Gusmão hodi ko’alia kona-ba kooperasaun serbisu iha área ekonomia.
Prezidente CCI-TL, Jorge Manuel Serrano, hateten, vizita ne’e atu informa ba PM kona-ba asinatura kooperasaun ne’ebé hala’o ona iha loron 19 dezembru 2024 atu nune’e ba futuru bele serbisu hamutuk hodi hadi’a ekonomia iha Timor-Leste.
“Primeiru-Ministru apresia no hato’o nia agradesimentu ba Prezidente Arsjad nia vizaun atu Timor-Leste bele iha kooperasaun di’ak iha futuru iha setór ekonómiku tanba haree katak setór produtivu sira bele kontribui ba dezenvolvimentu Timor-Leste nian,” Jorge Manuel Serrano, hateten, hafoin hasoru malu ho PM, iha Palásiu Governu, sesta ne’e.
Notísia relevante : CCI-TL no Federasaun Manufatura Singapura asina nota kooperasaun ba investimentu
Iha enkontru ohin ne’e, PM mós husu atu hametin liután parseria CCI-TL no KADIN iha pratika hodi hadi’a ekonomia rai-laran, muda pensamentu emprezáriu sira nian, liu-liu hahoris emprezáriu foun, empreza mikro, ki’ik no médiu atu hahú prodús iha rai-laran ho apoiu husi Kámara Komérsiu no Indústria Indonézia.
Iha biban hanesan, Prezidente Kámara Komérsiu no Indústria Indonézia, Arsjad Rasjid, hateten, durante enkontru, ekipa esplika oinsá Kámara Komérsiu Indonézia haree povu Timor-Leste nia fuan boot, dame di’ak tebes, haree husi mundu negósiu nian, entaun hanesan nasaun viziñu hakarak halo kooperasaun ne’ebé di’ak, hakbesik ba malu no bele ajuda malu.
“Indonézia iha ambisaun atu iha kresimentu ekonómiku 8%, pobreza 0%, ne’ebé interpreta hanesan matadalan ekonómiku ne’ebé tenke justu. Ho ida-ne’e, hein katak ho kooperasaun ne’e Timor-Leste mós bele susesu hamutuk,” nia akresenta.
Kooperasun ne’ebé parte rua sei estabelese maka sei serbisu hamutuk hodi bele hamosu tan empreza kiik, médiu no boot sira inklui haree mós ba setór negósiu sira hotu.
“Iha setór barak ne’ebé ita bele serbisu hamutuk, maibé xave mak diskute konetividade entre Indonézia no Timor-Leste husi parte terrestre, aéreu no parte tasi nian buat sira ne’e ita presiza ko’alia husi fuan ba fuan,” nia tenik.
Jornalista : Arminda Fonseca
Editora : Julia Chatarina
