DILI, 21 Dezembru 2024 (TATOLI) – Koordenadór ba vizita Papa Francisco husi Governu, atuál Ministru Administrasaun Estatál, Tomás do Rosário Cabral, relata katak osan millaun $2-resin, husi totál millaun $12 ne’ebé prevee ba vizita Papa fila ba kofre Estadu.
“Husi millaun $12 ne’e gasta mak $9,978,359.12 no osan ne’ebé fila ba kofre Estadu liu millaun $2”, governante ne’e aprezenta iha salaun Katedrál Dili, depoizde misa agradesimentu.
Osan ne’ebé aloka ba kada munisípiu rihun $45, enkuantu Ataúro ho Díli hetan rihun $25 no Rejiaun Administrativa Espesiál Oé-Cusse Ambeno hetan boot liu mak rihun $52.
Ministru relata tan katak verba ba apoia atividade vizita Papa nian iha Palásiu Prezidensiál hamutuk rihun $80, ba Ministériu Negósiu Estranjeiru rihun $20, ba Ministériu Defesa rihun $100, Ministériu Interió rihun $200, forsa konjunta rihun $80, Servisu Nasionál Intelijénsia rihun $80 Ministériu Saúde rihun $109, nomós aloka ba Sekretaria Estadu Arte no kultura hodi halo kamizola tais ba bainaka sira.
Aleinde ne’e mós aloka verba ba obra sira iha Tasi Tolu, Sentru Konvensaun Dili no Madre Asosiasi Lembaga Misionari (ALMA) no seluk tan.
Iha ámbitu aprezentasaun relatóriu ba gastu osan sira, koordenadór mós agradese ba padre no madre sira, entidade seguransa no defeza, parseiru sira, mídia nasionál no internasionál no ema hotu ne’ebé kontribui ba susesu vizita Papa nian.
Iha fatin hanesan, Prezidente Konferénsia Episkopál Timorense (CET, sigla portugés), Bispu Dioseze Maliana, Dom Norberto do Amaral, agradese ba entidade hotu ne’ebé inklui iha preparasaun vizita Papa nian no sai susesu no hamorin Timor-Leste ba mundu.
Agradese primeiru ba Prezidente Repúblika, José Ramos Horta, Primeiru-Ministru, Kay Rala Xanana Gusmão, Koordenadór Altu Nivel lidera husi Ministru Administrasaun Estatál, Tomás do Rosário Cabral, ho ekipa no husi igreja nian lidera husi sua eminénsia Kardeál do Carmo da Silva ho nia membru ne’ebé tulun ona Estadu no uma-kreda ba vizita amu Papa nian no ema hotu ne’ebé la temi ida pur ida. Maromak mak rekompensa”, nia hato’o.
Dom Norberto mós rekorda liafuan amu Papa nian ba jornalista sira bainhira viajen fila bá Vatikanu ‘ha’u-nia laran-monu ba Timor-Leste’, tanba povu Timór simu ho oin midar, hamnasa no tanis ho laran-haksolok hamriik iha dalan-ninin. Timor-Leste nia rikusoin mak nia povu”.
Nune’e mós reprezentante Vatikanu iha Timor-Leste, Monseñór Marco Sprizzi, rekoñese kolaborasaun no preparasaun husi igreja no Estadu ba vizita Papa nian.
“Ema hotu-hotu halo esforsu sein poupa enerjia ba vizita susesu amu Papa nian ho totál dedikasaun”, nia hateten.
Monseñór hateten bainhira hasoru malu resentemente ho Papa iha Roma, buat ne’ebé nia kontinua rekomenda ba foinsa’e sira mak kuidadu ferik no katuas sira, ba polítiku na’in sira kuidadu povu no ba relijiozu sira labele halo burokrasia no moris simples iha ema simples nia leet.
Notísia relevante: Governu konsege gasta millaun $9-resin ba preparasaun hotu hodi simu Papa Francisco
Jornalista: Jesuína Xavier
Editora: Maria Auxiliadora