DILI, 23 dezembru 2024 (TATOLI)–Governu liuhusi Ministériu Administrasaun Estatál (MAE) hamutuk ho órgaun eleitorál hanesan Sekretariadu Tékniku Administrasaun Eleitorál (STAE) no Komisaun Nasionál Eleisaun (CNE, sigla portugés) inklui ekipa munisipál sira, segunda ne’e, hahú halo preparasaun ba eleisaun suku ne’ebé sei akontese iha tempu besik.
“Ita parte tékniku avansa preparasaun ba readministrasaun aktu eleitorál ba eleisaun lideransa komunitáriu suku 19. Entaun, objetivu husi formasaun ohin ne’e atu halo divulgasaun kalendáriu eleisaun. Nune’e, formasaun ne’e ikus nian iha nasionál no formasaun sei kontinua iha loron 03 janeiru 2025 maibé realiza iha munisípiu. Tanba ne’e, husu ba ita hotu atu dedika-an ba formasaun ida-ne’e nune’e bele hetan susesu,” Diretór Jerál STAE, Elviro Fernandes Moniz, hateten, iha salaun STAE, Caicoli.
Formasaun ne’e ho objetivu atu divulga kalendáriu eleisaun nune’e husu nafatin parte hotu ne’ebé partisipa iha ne’e atu aselera tanba formasaun ne’e loron ohin, husi dadeer to’o lorokraik. Presiza parte hotu nia kontribuisaun no kolaborasaun oinsá bele hetan susesu iha eleisaun suku ne’e.
Notísia relevante : STAE hahú prepara eleisaun suku foun iha Baucau
Iha biban hanesan, Prezidente CNE, José Agostinho Belo, hateten, presiza aselera formasaun no simulasaun.
“Ita-nia eleisaun monu iha loron 25 janeiru nune’e parte hotu presiza serbisu tanba tempu badak ona nune’e simulasaun ne’e presiza lalais. Tanba ne’e, ami husi CNE apoiu tebes. Entaun, ita la’ós ona pasivu maibé ita ativu ona nune’e ita-nia eleisaun la’o ho susesu,” nia akresenta.
CNE nia parte mak kontinua halo edukasaun sívika ba aktu eleitorál iha territóriu, ba preparasaun eleisaun suku ne’ebé Konsellu Ministru aprova ona.
Nune’e mós, Diretór Jerál Dezenvolvimentu Governasaun Lokál, António Augusto Guterres, dehan, ohin atu halo preparasaun ba eleisaun suku.
“Ohin ita iha ne’e no rona katak ita atu hala’o eleisaun ba suku. Suku 15 ne’e foun ho aldeia ida maibé suku haat ne’e subtituisaun bazeia ba artigu 96, ne’ebé sei determina liuhusi dekretu Governu ida-ne’ebé afiksa data,” nia tenik.
Konsellu Ministru aprova projetu dekretu Governu ne’ebé fiksa data sira ba realizasaun Asembleia Aldeia no Konsellu Suku, iha ámbitu prosedimentu eleisaun líder komunitáriu sira nian.
Dokumentu ne’e esplika katak diploma ida-ne’e kumpre saida maka temi iha artigu 92.º husi lei nú. 9/2016, loron 08 jullu, hahú prosesu eleisaun ba líder komunitáriu sira iha Suku Ueru Mata (Laga, Baucau), Builai (Baucau, Baucau), Caibada Macasa’e (Baucau, Baucaun, Assui-Lau (Letefoho, Ermera), Koliate Lewen (Hatolia A, Ermera), Poetete Vila (Ermera, Ermera), Poetete Lodudu (Ermera, Ermera), Macadique de Cima (Uato -Lari, Viqueque) no Macadique de Baixo (Uato-Lari, Viqueque).
Liuhusi dekretu Governu ida-ne’e aprova mós kalendáriu eleisaun ba Xefe Suku Baduro (Lautém, Lautém), Laku-Mesak (Laclo, Manatuto), Iliheu (Manatuto Vila, Manatuto) no Poetete (Ermera, Ermera).
Jornalista : Osória Marques
Editora : Julia Chatarina
