COVALIMA, 26 dezembru 2024 (TATOLI) – Servisu Munisipál Asaun Sosiál (SMAS) Covalima, hahú husi janeiru to’o dezembru ne’e, apoiu ona kaixaun 328 hodi ajuda família matebian sira iha munisípiu Covalima.
Diretór Servisu Munisipál Clementino Bere, relata, Asaun Sosiál apoiu kaixaun hamutuk 328 ne’ebé gasta ona osan hamutuk $ 43,375.00 hodi ajuda família matebian sira bazeia ba pedidu
“Ami gasta ona osan hamutuk $ 43,375.00 hamutuk 328 ne’ebé ho medida kaixaun ne’ebé mak la hanesan depende família matebian sira hato’o pedidu hodi husu apoiu kaixaun ba matebian”, Clementino Bere dehan iha AMC, ohin.
Kaixaun ne’e fó apoiu hahú janeiru to’o ohin loron hamutuk 328 ne’e mai husi postu administrativu sira hanesan, Fatululik, Fohorem, Fatumea,Tilomar, Maucatar, Tilomar, Suai no Zumalai.
SMAS apoiu kaixaun hamutuk 328 kompostu ho nia medida kaixaun sira mak hanesan kaixaun ho medida boot hamutuk 210, naton 17 no ki’ik 101. Husi medida kaixaun hirak ne’e kompostu husi mane 137 no feto 191
Kaixaun ne’ebé mak fó apoiu ho medida kaixaun hanesan boot kada kaixaun ho nia folin $ 170, kaixaun naton ho nia folin kada kaixaun $ 95.00 no kaixaun medida ki’ik $ 60.00
Kritéria hetan apoiu
SMAS fó apoiu kaixaun ho nia kritériu mak hanesan, presiza lori deklarasaun husi xefe suku rasik, foto kopia kartaun eleitorál husi matebian no reprezentante família matebian nia kartaun eleitorál (KE)
Orsamentu jerál Estadu ba 2024 ne’ebé aloka ba Covalima hamutuk $ 7, 3 husi orsamentu ne’e aloka ba programa inkluzaun Sosiál hamutuk rihun $ 59 husi orsamentu ne’e aloka ba sosa kaixaun hamutuk rihun $ 50 .Husi orsamentu ne’e gasta atu sosa kaixaun hamutuk $ 43,375.00 saldo $ 6,625.
Jornalista: Celestina Teles
Editór: Rafael Ximenes de A. Belo
