DILI, 27 dezembru 2024 (TATOLI)—Ministériu Obra Públika (MOP) iha loron 24 dezembru 2024, provizóriamente loke ona ponte foun Kofi Annan (Casnafar) ba públiku, liu-liu komunidade husi munisípiu haat hanesan Aileu, Ainaro, Manufahi no Covalima.
Ministru Obra Públika, Samuel Marçal, hateten, objetivu loke tanba daudaun tempu udan no mota tun difikulta komunidade nia movimentu.
“Ita hatene konstruasaun ponte ne’e seidauk finaliza hotu, foin atinje 99%, maibé tanba ho kondisaun udan ita bele loke lai ba públiku hodi utiliza to’o tinan foun mak ita bele halo ninia inaugurasaun,” Ministru hato’o liuhusi gravasaun ne’ebé Agência Tatoli asesu, sesta ne’e.
Governu liuhusi MOP harii ponte foun Casnafar iha suku Bokolelo no suku Dare, postu administrativu Laulara, munisípiu Aileu atubele fasilita movimentu transporte ema no sasán.
Governu prevee ona orsamentu ho montante $3.632.896.18 liuhusi Fundu Infraestrutura (FI) hodi harii ponte ne’e.
Notísia relevante : Governu fó naran ponte Casnafar sai “Ponte Kofi Annan”
Empreza Carya Timor-Leste, Lda responsável ba projetu ne’e, hahú konstrusaun iha loron 24 novembru 2023 no tuir planu sei inaugura iha tinan foun.
Konstrusaun ponte Casnafar tuir medida neʼebé mensiona iha kontratu ho naruk metru 70, maibé husi empreza Carya Timor-Leste, Lda oferese tan metru 10 ba Governu Timor- Leste, nune’e ponte nia naruk metru 80.
Vise-Primeiru Ministru no Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, akompaña husi Ministru Obra Públika, Samuel Marçal no Ministru Planeamento Estratejiku-Gastão de Sousa, antes ne’e lansa fatuk dahuluk konstrusaun iha loron 26 novembru 2023.
Jornalista : Arminda Fonseca
Editora : Julia Chatarina
