iklan

EKONOMIA, KOVALIMA

Orsamentu PME 2025 ba Covalima hamutuk milliaun $ 1, 165, 367, 68

Orsamentu PME 2025 ba Covalima hamutuk milliaun $ 1, 165, 367, 68

Merenda Eskolár. Imajen/Dok. Tatoli

COVALIMA, 27  dezembru  2024  (TATOLI) –Orsamentu implementasaun  Programa Merenda eskolár (PME) iha tinan-2025,  ba munisípiu Covalima,  hamutuk milliaun $ 1,165,367,68, Diretora Servisu Munisipál Edukasaun Covalima, Elda de Fátima,  informa.

“Sei aloka ba eskola pre-eskolár hamutuk $ 110.520 no ba eskola ensinu báziku $ 1,278.029”, Elda de Fátima, aprezenta iha salaun AMC ohin.

Atu implementa PME iha 2025  ne’e, Edukasaun Covalima halo ona preparasaun nune’e ona elobora planu atu fasilita formasaun ba Ekipa Jestaun Programa (EJP) 23 ne’ebé mak durante ne’e ezekuta orsamentu PME iha munisípiu Covalima.

Alunu ne’ebé benefísia ba PME 2025 ne’e hamutuk 18,828, ne’ebé kompostu husi eskola pre-eskolár (EPE) alunu hamutuk 1,920, alunu husi eskola báziku (EB) hamutuk 16,828.

Realizasaun PME 2025 durante loron efetivu 148, ne’ebé implementa hosi Ekipa Jestaun Programa (EJP) 23 ne’ebé kria ona no kada alunu iha direitu ba han ho montante sentavu 0, 35

Bazeia ba planu husi servisu munisipál  edukasaun, submete pedidu orsamentu ba Prezidente Autoridade Covalima, Miguel Armada Cardoso,  iha loron 3 janeiru 2025 hafoin prosidementu aprovizionamentu; kuotasaun.

Fó hanoin fali katak, implementasaun programa merenda eskolar 2024 hala’o lansamentu iha eskola bázika sentral suai loro 13 maiu no iha 2025 implementasaun PME sei lansa iha Eskola Bázika Sentrál Sandalo iha loron 13 janeiru ne’e.

Iha sorin seluk, Diretór EBC Lontale, Hermino Carvalho,  reforsa katak, servisu edukasaun  Covalima  presiza distribui kalendáriu implementasaun Programa Merenda Eskolár  (PME)  ba estabelesimentu ensinu sira .

“Ami presiza atu hatene lista benefisiáriu, ekipa jestaun programa presiza distribui relatóriu ezekusaun orsamentu PME no bainhira ekipa sira atu halo monitorizasaun presiza fó koñesementu ba diretór eskola sira” nia fó hanoin.

Diretora EBC Fatumea, Iria Sena rekomenda atu kontinua implementa presiza atu haree problema hodi dada bee-moos ba eskola sira tanba durante implementa PME estudante sira mak lori bee no fonsedór hahan ba PME sira mak kuru rasik bee ho distánsia dook.

Notísia relevante:SMAP identifika pontu 12 ligadu ho implementasaun PME iha Covalima

Jornalista: Celestina Teles

Editór: Rafael Ximenes de A. Belo

 

iklan
iklan

Leave a Reply

iklan
error: Content is protected !!