Autoridade Luca Viqueque kontinua husu Governu harii ponte Welolo
VIQUEQUE, 31 dezembru 2024 (TATOLI)-Xefe Suku Luca, postu Viqueque Vila, munisípiu Viqueque, Manuel Gomes, husu, Governu kontitusionál da-sia (IX) atu konstrui ponte Welolo ne’ebé lokaliza iha aldeia Uma-boot, suku Luca tanba iha tempu udan difikulta movimentu transporte no ema la’o ain.
“Ohin, loron udan hela de’it mota Welolo kontinua boot komunidade sira-ne’ebé hela área ne’ebá difisil sai difisil tanba bele fó impaktu ba komunidade sira-nia vida. Tanba ne’e ha’u hakarak husu ba Governu liuhusi Ministériu Obra Públika (MOP) harii ona ponte Welolo ba periorídade iha tinan-2025 hodi fasilita ita-nia komunidade sira. Sé Governu la harii sedu, ita-nia povu mak sai terus tanba komunidade sira atu mai vila labele no husi vila ba mós labele kuandu mota bo’ot”, Manuel Gomes, hateten ba TATOLI, iha postu Viqueque vila, ohin.
Autoridade suku Luca ne’e konta, antes ne’e ministru MOP dehan ona tau orsamentu miliaun $1 ba konstrusaun ponte Welolo, maibé to’o agora prosesu oinsá ona nu’udar autoridade seidauk rona rezultadu.
“Nune’e ha’u-nia esperansa tomak ba Governu tama ba tinan oin, bele fó resposta ba ponte Welolo, atu povu Luca ne’ebé hela partense ne’ebá no estudante sira bele asesu eskola ho di’ak. Durante ne’e husi janeiru 2024 komunidade no estudante sempre hasoru difikuldade ba mota Welolo”, nia realsa.
Nune’e líder komunitária ne’e dehan, bainhira governu implementa, harii ponte no kanaliza bee ba tasi, autoridade no komunidade suku Luca prontu kolabora ho Governu hodi tau-matan ba serbisu konstrusaun ponte no kanaliza bee ba to’o iha mota.
Notísia relevante: https://tatoli.tl/2024/02/15/mota-uelolo-sulin-tuir-estrada-difikulta-estudante-profesor-presiza-normaliza/
Iha sorin seluk, Diretór servisu obra públika munisípiu Viqueque, Casildo Gomes Soares, hatan, kona-ba mota Welolo foin lalais Obra públika halo koordenasaun ho Institutu Jestaun Ekipamentu no Apoiu Dezenvolvimetu Infraestutura, Institutu Públiku (IGEADI,I.P) no haruka pedidu mós ba Prezidente IGEADI,I.P hodi halo normalizasaun ba mota atu proteje mota Welolo.
“Dadauk ne’e koordena ona IGEADI,I.P atu halo normaliza mota ne’ebé agora afeta ba komunidade sira-nia hela fatin. Maibé, estudu detallu atu harii ponte Welolo ne’e kompeténsia MOP nasionál ne’ebé dadauk ne’e sira sei halo estudu no levantamentu hodi haree kondisaun mota Welolo nomós konsultan sira sei prepara hela dezeñu ba mota Welolo oinsa hari’i ponte Welolo”, nia haktuir.
Kona-ba koordenasaun entre obra públika munisípiu nia dehan, ba koordenasaun servisu parte MOP nasionál no munisípiu hato’o nafatin preokupasaun autoridade no komunidade nian ba ministériu, maibé fila fali ba kompeténsia nasionál hodi haree kestaun sira-ne’e.
“Ami-nia koordenasaun entre ministériu la’o nafatin ba nasionál tanba dalan no ponte Welolo sai ba preokupasaun munisípiu Viqueque tomak nian. Tanba ponte Welolo dalan nasionál ne’e kompeténsia Ministériu nian hodi foti desizaun. Ami munisípiu nian responsavél mak foti informasaun no dadus sira hodi relata ba ministériu hodi haree,” nia tenik.
Tuir dadus populasaun Luca hela iha aldeia Uma Boot komunidade uma-kain 31 mak sai afetadu ba mota tanba mota sulin tuir estrada hodi estraga komunidade sira-nia uma inklui eskola ida.
Jornalista : Vitorino Lopes da Costa
Editór : Rafael Ximenes de A. Belo
