DILI, 06 janeiru 2025 (TATOLI)—Membru Parlamentu Nasionál (PN) liuhusi Deputada PD, Maria Teresa Gusmão, apoia Governu liuhusi Sekretária Estadu Asuntu Toponímia no Organizasaun Urbana (SEATOU) muda sai komunidade ne’ebé hela iha área risku ba dezastre naturál maibé presiza kria kondisaun.
Notísia Relevante: SEATOU-MOP informa prosesu indemnizasaun ba komunidade Fomentu II
Nia dehan, komunidade ne’ebé hela iha fatin besik iha mota ninin, foho lolon risku tebes ba dezastre naturál iha tempu udan, tanba ne’e apoiu tebes SEATOU ne’ebé hasai komunidade hela iha mota ninin Comoro-Fomento II nian.
“Ita haree, udan tau makaas iha Dili sempre akontese inundasaun liuliu iha Comoro, uma sira-ne’ebé iha aas no besik liu mota estraga ita-nia populasaun nia uma no ema mós sai vítima. Maibé, ha’u husu atu kria mós kondisaun ba populasaun ne’ebé Governu muda sai,” nia hateten ba jornalista sira iha resintu PN, segunda ne’e.
Nune’e, ni husu, ho ema ida-idak nia konsiénsia atu labele duni konstrui uma no hela iha fatin ne’ebé risku dezastre ba populasaun ninia uma no nia aan rasik.
SEATOU nia planu tuir ordenamentu ba sidade lDili liuliu prevene dezastre ba populasaun, hanoin SEATOU iha dever duni atu halo liuliu fatin sira-ne’ebé risku ba komunidade.
“Ba sira-ne’ebé halo ona iha fatin risku tenke hasai duni ba fali fatin seluk ne’ebé seguru liu,” nia hateten.
Deputada FRETILIN, Helena Martins, apoiu SEATOU atu hasai komunidade ne’ebé konstrui uma no hela hela iha fatin risku ba dezastre naturál, maibé presiza kria kondisaun liuliu fó indemnizasaun nune’e komunidade bele harii fali sira-nia uma.
Jornalista : Nelson de Sousa
Editór : Cancio Ximenes