DILI, 06 janeiru 2025 (TATOLI)–Governu liutiha Sekretáriu Estadu Asuntu Toponímia no Organizasaun Urbana (SEATOU) no Ministériu Obra Públika informa prosesu indemnizasaun ba komunidade iha Fomentu II.
Sekretáriu Estadu Asuntu Toponímia no Organizasaun Urbana (SEATOU), Germano Santa Brites, husu populasaun hodi hatama dokumentu atu bele hetan rekomendasaun ba kompensasaun despeju administrativu iha aldeia Fomentu II Comoro, tanba iha ameasa mota estraga no halakon populasaun nia moris.
Notísia Relevante: SEATOU muda sai populasaun iha Fomento II Comoro
“Kuandu diresaun Obra Públika halo levantamentu dadus ba populasaun signifika sira-nia direitu mós iha. Sira (populasaun) entrega eleitorál no kestaun konta banária (rekening) depois diresaun aprovizionamentu iha Ministeriu Obra Públika halo prosesu osan ka buat ruma ba sira,” Nia hateten ba jornaslista sira iha Fomentu II, segunda ne’e.
Governante ne’e hateten, prosesu ba rekompensassun ne’e agora la’o hela no dever populasaun nian mak sira kontribui hodi hamamuk fatin, tanba sidadaun rasik tenke sai autór ba dezenvolvimentu.
Iha fatin hanesan, Ministru Obra Públika (MOP), Samuel Marçal, reforsa iha fulan hirak liuba ekipa MOP halo ona levantamentu dadus atu populasaun bele hetan kompensasaun tuir kustu ba obra ne’ebé sira halo.
“Aproveita momentu ida-ne’e liuhusi mídia, husu ba rejista no hatama konta bankária, tanba Governu labele selu cash. Ba loke konta bankária iha Banku no hatama ba iha edifisu MOP nian,” nia husu.
Ministru ne’e hateten, pagamentu ne’e la’o bainhira Governu hahú ezekuta Orsamentu Jerál Estadu 2025 nian.
“Osan hamutuk millaun $3 ba tinan ida-ne’e, ba indemnizasaun, kustu sira ladún boot, kuaze por volta $3.000 to’o $5.000,” nia dehan.
Tuir orsamentu ne’e ba iha pagamentu ba iha despezu administrativu ne’ebé Governu halo ba populasaun sira.
Jornalista : Jesuína Xavier
Ediór : Cancio Ximenes