BAUCAU, 06 janeiru 2025 (TATOLI) – Komandu Polísia Nasionál Timor-Leste (PNTL) munisípiu Baucau suspeita autór na’in-tolu utiliza kila anin hodi hakanek vítima inisiál OF iha suku Gariuai, postu administrativu Baucau Vila, munisípiu Baucau.
Kazu referida akontese iha loron-03 fulan-janeiru kalan bainhira vítima OF (mane), idade 28 hetan tiru hosi autór na’in-tolu iha área aldeia Maucale, suku Gariuai, postu administrativu Baucau Vila.
“Ita buka tuir autór, kaer kedas iha momentu ne’ebá. Autor na’in-tolu submete ba prosesu investigasaun iha Eskuadra Baucau Vila,” Komandante PNTLMunisípiu Baucau, Superintendente Xefe António Maria de Sá hateten iha Vila Nova, segunda ne’e.
Kazu ne’e deskonfia autór no vítima sira iha odiu ba malu nune’e suspeitu na’in-tolu ho insial N, M no A hein vítima iha dalan hanesan utiliza arma hanesan kilat anin hodi tiru vítima hetan kanek iha parte kabun.
Nune’e, PNTL Baucau direita halo kedas halo identifikasaun no evakua vítima ba Ospitál Rejionál Eduardo Ximenes (HoREX, sigla portugés) hodi kontinua halo tratamentu tanba hetan kanek iha parte kabun.
‘’Ha’u haree sira halo senáriu ruma, maibe ita la’o tuir lei, Polísia kaptura autór no rejistu iha Ministériu Públiku, kontinua la’o ba oin,’’ Superintendenti de Sá akresenta.
PNTL liuhosi eskuadra Baucau Vila konsege kaptura suspeitu sira iha aldeia Maucale no kontinua halo investigasaun to’o hetan Termu Identidade Rezidénsia (TIR) iha loron-04 janeiru.
Kazu referida rejista ona iha Ministériu Públiku (MP) hodi hein prosesu kontinuasaun iha Tribunál Distritál Baucau.
Jornalista : Natalino Belo
Editór . : Evaristo Soares Martins