DILI, 07 janeiru 2025 (TATOLI)–Prezidente Asosiasaun Turizmu Relijiozu Timor-Leste (ATR-TL), Pe. Ângelo Salsinha, hateten ekipa ATR-TL prepara hela pakote ba peregrinasaun tinan jubileu 2025 iha Timor-Leste.
Notísia Relevante: Kreda TL selebra misa abertura tinan jubileu 2025 “Peregrino da esperança”
Lansamentu tinan jubileu 2025 ho tema “Peregrino da Esperança” ba igreja lokál halo ona husi Arsebispu Arkidioseze Metropolitana Dili, Dom Virgílio Kardeál do Carmo da Silva, SDB, iha igreja Katedrál Dili, hodi bele ba vizita fatin relijiozu sira hanesan Nain Feto da Grasa Ramelau, Fatubesi, Oé-Cusse iha Santa Rosa no Ataúro ba tinan jubileu ne’ebé sarani sira hakarak atu manán induljénsia plena.
Ida-ne’e, nia dehan, grupu ka instituisaun, familia ka pesoál, ema idak-idak mak tenke halo ninia peregrinasaun ba fatin hirak ne’e atu manán induljénsia.

“Agora dadaun Asosiasaun Turizmu Relijiozu iha ona planu. Ita haruka daudaun labariik sira atu estabelese pakote. Ezemplu, ba Oé-Cusse iha pakote ida iha peregrinasaun sarani sira iha Dili hakarak ba iha ne’eba. Familia ka grupu ba iha ne’eba la’ós ba Santa Rosa de’it atu reza, halo adorasaun, misa iha ne’ebá, maibe bele ba iha Santa Reliti no fatin seluk hanesan peregrinasaun ida,” padre ne’e hateten ba Agência TATOLI, liuhusi telefónika, tersa ne’e.
Nia esplika, peregrinasaun ne’e edukativu hodi la’o konta istória no partilla daudaun esperiénsia fiar nian, tanba ne’e iha tempu besik sei forma labarik sira ba partisipa peregrinasaun ne’e hamutuk 50 ba ospitalidade, ba seluk hetan labarik na’in-44, entaun prepara halo pakote atu implementa.
Ezemplu, nia hateten, ba vizita Ramelau la’ós de’it fatin ne’ebá, maibé ba turizmu istóriku, kulturál no buat hirak ne’e, ema bele esplora fatin istóriku nasaun nian, halo misa no reza hodi manán induljénsia.
“Tanba ne’e variasaun pakote ida-ne’e hanesan hanoin ida atu halo oinsá selebra didi’ak peregrinasaun tinan jubeliu ne’e halo ho didi’ak bele manán grasa ida-ne’e. Durante perehrinasaun ne’e mós sei prevee fatin atu ema-ne’e presiza kondisaun ida iha, ba toba fatin ne’e lori deskansa loron hira, oras hira, iha ona ninia pakote ne’e no envolve ema barak,” nia dehan.
ATR-TL prepara daudaun ona ekipa ida hala’o servisu hodi halo preparasaun ba pakote ne’e, hafoin tempu badak sei anunsiu ba instituisaun liuhusi parokia sira tanba husi parokia bele organiza halo peregrinasaun ne’e la’o di’ak.
Nia husu ba sarani sira, agora ne’e halo peregrinasaun ne’e labele hein fali buat hirak ne’e, manán grasa ne’e família idak-idak bele hala’o daudaun hodi labele hein organizadu liu maibé ATR-TL agora kontaktu hela Amu Parokia no autoridade sira, oinsá pakote ne’ebé halo ne’e organizadu atu hetan buat ruma kona-ba grasa ne’e saida no konteúdu tinan jubilee nian ne’e.
Nia hateten, problema boot mak transporte no dalan atu asesu fatin istóriku hirak ne’e, tanba ne’e hanoin hela oinsá atu kria tanba buat ida-ne’e servisu hamutuk ho ema sira-ne’ebé iha alojamentu ne’e presiza toba iha ne’ebé, oinsá kona-ba hahan, transporte lori ba oinsá, asesu dalan ba iha ne’eba oinsa, karreta, ho buat hirak ne’e tenke iha para bele la’o.
Ida-ne’e halo fali reflesaun ida atu iha esperansa no iha fiar ida halo ema livre duni katak bele sente haksolok, tanba manán grasa ida-ne’e ho ninia sakrifisiu sira-ne’ebé halo ne’e, nia manán grasa.
Mudansa tinan jubileu ne’ebé akontese iha testamentu tuan nian ne’e hatudu kada tinan 50 ne’e hanesan manán grasa ida, hanesan ema sira-ne’ebé deve nasaun ne’ebé tusan barak durante tinan 50 ne’e liberta ona husi ninia tusan no nia moris foun fila-fali, ida-ne’e oinsá ema bele liberta malu, kore husi nia fukun sira tradisaun biblia nian.
Maibé, nia haktuir, depois muda fali iha Amu Papa Joao Paulo II nian, tinan jubileu iha tinan 2000 la’ós selebra iha kada tinan 50 maibé selebra fali ba tinan 25 de’it, ema kristaun halo peregrinasaun manán induljénsia, perdaun, rekonsiliasaun, domin no pás, ida-ne’e mak tenke halo fila-fali, hanesan momentu grasa ida ema halo peregrinasaun ba fatin-fatin, ne’ebé uma kreda lokál determina ona.
Jornalista : Jesuína Xavier
Editór : Cancio Ximenes