DILI, 29 dezembru 2024 (TATOLI)–Kreda Timor-Leste ho sarani sira, domingu ne’e, selebra misa abertura ba tinan jubileu 2025 ba da-28 ho tema “peregrino da esperança” iha igreja Katedrál Nossa Senhora Imaculada Conceição, Dili.
Misa abertura ne’e prezide husi Arsebispu Arkidioseze Metropolitana Dili, Dom Virgílio Kardeál do Carmo da Sillva, SDB, ho porsisaun husi Katedral kotuk ba Katedrál laran. Iha selebrasaun ne’e, marka prezensa husi Reprezentante Vatikanu iha Timor-Leste, Monsenhor Marco Sprizzi, padre, madre no sarani sira.
Dom Virgílio Kardeál do Carmo da Silva hato’o agradesimentu ba Santissima Trindade ba Vigáriu sira Kristu ninian ne’ebé kada tinan 25 deklara ano Santu, tinan grasa no tinan bensaun nian. Papa F
“Deklarasaun ano Santo kada 25 anos, ita bele dehan momentu ida grasa ninian, tanba momentu uma kreda bolu sarani hotu-hotu atu fila-fali ba Maromak, fila ba kreda tanba Maromak ne’e laran luak mizerikordia. Ita agradese liuliu ba Sia Santidade Papa Francisco ba ano Santo tinan 2025 fihir tinan ida-nee ho ninia tema “Peregrino da Esperança”. Ita hotu ne’ebé la’o ho laran metin, fiar metin la’o ba finalidade ida,” Arsebispu hateten iha nia omilia iha misa abertura ne’e.
Tema “Peregrino da Esperança”, liafuan rua ne’ebé haree katak tau hamutuk iha programa ida de’it nu’udár Peregrinu la’o hamutuk atu halo saida, atu haklaken hodi fó sasin ida-ne’e mak sarani ida ba nia ano Santo ne’e ema idak-idak koko atu halo no atu moris tuir.
Dom Virgílio dehan, haklaken no sasin esperansa ida-ne’e, konvite ida atu sarani idak-idak koko husu ba nian aan, se sarani ida hatene saida mak esperansa no oinsá atu hatene moris iha esperansa.
“Esperança mak dalan atu tulun ita tama iha relasaun ne’ebé klean liu tan ho Maromak, Sao Paulo nia karta ba Timotiu hakerek Kristu mak ita nia esperansa. Ohin Ita halibur hamutuk iha domin iha familia nazare sai motivu ne’ebé klean no metin iha esperansa,” arsebispu tenik.
Maromak nia domin ne’ebé hatudu liuhusi liafuan halo aan ba ema liuhusi sinál krús, tan ne’e ohin prosesaun la’o tuir dalan krús.
Kruz mak abut ba salvasaun, nunee Peregrinu esperansa nian mak saida iha krús ida, kaer metin krús ne’ebé abut metin maske ema-ne’ebé iha kór oioin hatudu universalidade.
Selebrasaun ida-ne’e bele dehan ohin loke ne’e la’ós loke odamatan, loke ano Jubileu da Esperança, tanba Amu Papa Francisco Loke tiha ona ano jubileu ne’e iha Roma, iha Nataál kalan (tersa, 24 dezembru 2024) no agora tenke la’o tama husi odamatan ne’ebé tama mai nian.
“Ita nu’udar ema ida laran metin ba Nai Maromak. Amu Papa firme iha igreja partikulár sura ita mós loke tinan jubileu hamutuk ho selebra festa sagrada familia, ne’e la’ós kebetulan, ita hahú tinan grasa hamutuk hahú husi familia. Sagrada familia mak hanorin ema sai modelu ida atu aprende ho maneira simples maibe kle’an la’ós atu dehan de’it Maromak hadomi de’it,” nia hateten.
Kardeál haktuir, São José mós konfuzaun barak hamutuk ho Maria maibé São jose la rezolve ho forsa maibé hakaas aan atu buka oinsá respeita nafatin Santa Maria atu halo di’ak no la halo aat ba nia, Jesus Moris iha ambiente ida sagrada família nian, sira moris iha komprensaun ida perfeitu no iha armonia iha tempu susar no ksolok
Ambiente ida-ne’e mak transforma uma ida ba família ida, ema hotu iha uma maibé karik la’ós família hotu bele sai uma ida, bainhira laiha valór familia, uma harii ho fatuk, ai no besi, maibé familia harii husi relasaun ida mutual.
Inan-aman mós iha responsabilidade espirituál tanba bainhira lori oan mai sarani sempre hatán prontu. Maibé, keta de’it iha loron batizmu maibé lori ne’e konvida ema hodi hanoin fali responsabilidade espirituál no grasa ida buras ho matenek rai nian no Maromak nian
Hirak ne’e hotu, fó hanoin ba ema hotu dever oan sira-nian ba inan-aman, no se família laiha dame no hirus malu hela de’it, ne’e tenke lee Karta São Paulo ba Tesalonika (3, 21.)
Nia esplika, ohin loron, ema moris iha mundu ida hree buat oioin, tantu iha rai-laran no li’ur, halo ema lakon pasensia ba malu no fasil liu atu lian makaas hakilar malu, ema ida-idak ezije Nia Direitu, ezije nia Liberdade.
Maibé, buat ne’ebé aprende husi família nazare mak silénsiu no família nazare katak hanorin ema kona-ba pás, buka atu rona Maromak nia lian, buka aprende, hanorin kona-ba importánsia, dixiplina espirituál, ba ema hotu ne’ebé hakarak moris no buras iha fiar esperansa no karidade.
Tuir nian, inan-aman sira família nian sei hetan iha São José nu’udar modelu admiravel, inan sira haree ba Maria nu’udar modelu domin no respeitu no haree iha Jesus ne’ebé hatene halo tuir nia aman-inan.
Tanba ne’e, nia dehan, santa kreda haree loron ohin ne’e atu reza ba família sura tan família ne’e importante ba futuru igreja, sarani sira presiza reza barak liu atu família metin nafatin, no atu bali no kuida familia hotu iha rai ida-ne’e.
Peregrinou da esperansa sei hala’o iha fatin lima hanesan Katedrál Dili, Fatubesi, Ramelau, Oé-Cusse, no Ataúro.
Jornalista : Jesuína Xavier
Editór : Cancio Ximenes
