iklan

KOVALIMA, HEADLINE

Edukasaun Covalima simu ona PKRIE neen

Edukasaun Covalima simu ona PKRIE neen

Diretora Servisu Munisipál Edukasaun Covalima, Elda de Fátima. Foto/Celestina Teles.

COVALIMA, 07 Janeiru 2025 (TATOLI) – Servisu Munisipál Edukasaun Covalima simu ona Projetu Konstrusaun no Reabilitasaun Infraestrutura Edukativa (PKRIE) 2023 nian hamutuk neen, ne’ebé implementa iha tinan kotuk no falta tolu mak seidauk.

Diretora Servisu Munisipál Edukasaun Covalima, Elda de Fátima, dehan implementasaun projetu komunitáriu 2023 ne’e hamutuk sia mak hanesan konstrusaun no reabilitasaun ba Eskola Bázika Filiál (EBF) Zulo Taz, EBF 1,2 Tilomar, Eskola Bázika Sentrál (EBC) Foho Bua, Ensinu Pré-Eskolár (EPE) Suai-Loro, EPE Ogues, EPE Belulik Kraik, ne’ebé entrega ona ba Edukasaun Covalima iha Dezembru, falta EBF Tobur, EPE Tali-Oan no Eskola CAFE Suai.

“Konstrusaun no reabilitasaun eskola sia nia prosesu konstrusaun finaliza ona, projetu neen mak entrega ona, falta eskola tolu mak seidauk tanba sei tuur hamutuk halo planu atu realiza serimónia inaugurasaun”, Elda de Fátima dehan iha Santa Rosa ohin.

PKRIE sia ne’e ezekuta husi grupu kominitáriu ka komunidade sira ho totál orsamentu  hamutuk $857.818,80.

Projetu sia ne’e mak reabilitasaun no konstrusaun ba Eskola Bázika Filiál (EBF) 1,2 Tilomar ho osan $82.859,98, Pré-eskolár Belulik Kraik $99.147,20, Pré-eskolár Ogues $96.524,37, Suai-Loro $95.518,89, Tali-Oan $108.804,9, EBF Tobur $84.298 13, Eskola Bázika Sentrál Fohorem $85.228,33, Pré-Eskolár Camnasa $109.338,63 no Zulo Taz $96.098,36.

Dirijente Edukasaun Covalima ne’e salienta katak tuir loloos projetu kontrusaun no reabilitasaun eskola tolu entrega ona, maibé serimónia inaugurasaun presiza partisipa husi tékniku Ajénsia Dezenvolvimentu Nasionál, tanba ne’e sei hein kalendáriu atu entrega.

Prezidente ba implementasaun projetu komunitáriu, João Magno, dehan konstrusaun eskola tolu ne’e finaliza iha inísiu Dezembru no la konsege entrega tanba okupadu ho serbisu sira seluk, maibé daudaun ne’e hein atu entrega dala ida.

Notísia relevante: Projetu konstrusaun no reabilitasaun eskola sia iha Covalima konkluídu

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!