DILI, 07 janeiru 2025 (TATOLI)–Grupu komunitáriu ne’ebé sai responsável ba projetu, hahú ona konstrusaun koziña Eskola Ensinu Báziku Sentrál (EBC, sigla portugés) 18 iha munisípiu Manatuto.
“Grupu komunitáriu ne’ebé hahú konstrusaun dapur (koziña) referida ne’e hahú sukat no prosesu konstrusaun hahú la’o. Durasaun konstrusaun ita tau ba fulan-rua, ne’ebé hahú janeiru sei to’o marsu tinan ne’e,” Diretór Edukasaun munisípiu Manatuto, Patrício da Cruz Quintão, informa ba Agência Tatoli, iha ninia knaar fatin, Ministériu Edukasaun (ME), Vila Verde, tersa ne’e.
Notísia relevante : Konstrusaun kuziña Eskola EBC 18 iha Manatuto iha faze elaborasaun matadalan
Tuir Patrício da Cruz, konstrusaun ne’e másimu bele to’o fulan-rua.
“Espera projetu ida-ne’e bele finaliza lalais no entrega nune’e ita-nia eskola sira bele uza ba programa merenda eskolár nian,” nia akresenta.
Totál orsamentu ba konstrusaun kuziña 18 ne’e hamutuk rihun $135, ne’ebé kustu ba kada instalasaun $7.500.
Antes ne’e, Diretór Nasionál Infraestrutura no Edukativu iha ME, Hélio Lopes, hateten, ME iha polítika atu halo konstrusaun infraestrutura pakote prototipu eskola iha tinan ne’e.
“Ami iha planu atu halo konstrusaun pakote ida neʼebé prototipu ba tinan 2025. Halo dapur tanba iha merenda eskolár, kazadebañu, biblioteka, profesór sira-nia rezindénsia, saladeaula, inklui sala reuniaun profesór nian,” nia tenik.
Diretór konsidera planu ne’e importante tanba bele hasa’e kualidade edukasaun iha Timor- Leste.
Jornalista : Osória Marques
Editora : Julia Chatarina