DILI, 07 janeiru 2025 (TATOLI)—Klase internasionál iha Universidade da Paz (UNPAZ) no Universidade Católica Timorense (UCT) hahú ona aula.
“Estudante husi Índia ne’ebé tama klase internasionál iha UNPAZ no UCT hahú ona iha loron 16 dezembru 2024 no maluk estudante Índia ne’e hamutuk 32, nia dosente timoroan na’in-tolu no na’in-ida husi Índia,” Asisténsia Dosente Klase internasionál iha UNPAZ, Virgílio Casnive, informa ba Agência Tatoli iha resintu UNPAZ, tersa ne’e.
Nia dehan, ida-ne’e ba faze dahuluk, enkuantu ba faze daruka mak estudante na’in-47 ne’ebé daudaun ne’e eskola ona iha UCT. Nune’e mós sei iha tan faze tuir mai iha fevereiru ho estudante hamutuk 700-resin.
“Ida-ne’e pasu ne’ebé di’ak tebes ba edukasaun tanba hahú ona klase internasionál, ne’ebé estudante rai seluk mai apreende no adapta iha ita-nia rain. Nune’e mós ita-nia estudante ba apreende iha ema-nia rain. Ida-ne’e importante tebes, tanba ne’e presiza kontinua programa ida-ne’e iha universidade seluk,” nia katak.
Notísia relevante : Estudante klase internasionál UNPAZ hahú ona orientasaun iha Índia
Virgílio Casnive haktuir, durante akompaña iha saladeaula, estudante iha klase internasionál ne’e di’ak ona maibé dezafiu ida mak sira sempre tarde mai eskola tanba hahán to’o tarde oituan.
“Sira hela iha asrama Fatuhada, bus ida mak ba lori sira hahú tuku 09:00 no tuku 10:00 hahú prosesu aprendizajen to’o tuku 16:00,” nia tenik.
Jornalista : Osória Marques
Editora : Julia Chatarina