DILI, 07 janeiru 2025 (TATOLI)—Prezidente Komisaun C trata asuntu Finansa Públika iha Parlamentu Nasionál (PN), Cedelízia Faria dos Santos, husu Ministériu Finansa (MF) atu bele distribui ona pakote Orsamentu Jerál Estadu (OJE) 2025 ba liña ministerial hodi labele fó impaktu ba ezekusaun orsamentu.
Notísia Relevante: PM Xanana atualiza regra ezekusaun OJE 2025 ba Xefe Estadu
Nia husu ba Vise-Ministru Finansa ka parte Governu nian bele hateten ba PN, tanba povu hotu hatene no akompaña katak Orsamentu Jerál Estadu (OJE) 2025 ita Parlamentu aprova no Prezidente promulga molok dezembru 2024, no Governu rasik aprova ona dekretu ezekusaun iha reuniaun Konsellu Ministru.
“Parabéns ba ida-ne’e. Maibé to’o loron horisehik, ha’u seidauk haree katak Ministériu Finansa distribui pakote orsamentu 2025 ba liña ministeriál sira hotu no akompaña free balance to’o agora ita seidauk loke, inklui portál transparánsia sei disponível hela. Tanba ne’e, ami husu Governu nia parte bainhira mak bele distribui pakote orsamentu 2025 nian, ho ida-ne’e labele fó impaktu ba ita-nia ezekusaun,” Nia hato’o liuhusi intervensaun iha reuniaun plenária PN, tersa ne’e.
Nia foti kesatun ida-ne’e tanba problema boot bainhira hala’o fiskalizasaun iha eskola sira liuliu ba programa merenda eskolár, tanba bainhira orsamentu tama tarde kuaze munisípiu barak mak iha fulan tolu nia laran, sira labele ezekuta sira-nia orsamentu ba merenda eskolár no osan refere fila-fali ba kofre Estadu ne’e fó impaktu ba labarik estudante sira.
“Tanba ne’e, ami husu se bele prosesu hotu-hotu ne’ebé la’o lais ona, Governu labele impede iha implementasaun,” nia hateten.
Vise Ministru ba asuntu Parlamentár, Adérito Hugo da Costa, responde katak dekretu ezekusaun aprova no hetan promulgasaun ona agora entrega vigór ona antes 01 janeiru 2025 no loron ohin (tersa, 07 janeiru 2025) ne’e, konvokatóriu husi Ministériu Finansa (MF) halo ona ba liña ministériu hodi mai hala’o reuniaun iha MF atu bele halo abertura ba sistema, nune’e ezekusaun bele hahú dadaun ona.
Jornalista : Nelson de Sousa
Editór : Cancio Ximenes