VIQUEQUE, 07 janeiru 2025 (TATOLI)- Polísia Nasionál Timor Leste (PNTL), Eskuadra Uatulari, munisípiu Viqueque, rejista kazu rua no aprezenta ona ba Ministériu Públika (MP),durante selebrasaun Natál tinan 2024 no Tinan Foun 2025.
“Iha selebrasaun ne’e situasaun la’o di’ak no hakmatek nian laran. Maibé, depois ramata misa sai iha li’ur atu ba uma mak joven sira provoka malu no tuda malu iha estrada públiku sira. Nune’e durante iha selebrasaun ne’e ami rejista kazu rua ho tipu kazu asaltu malu iha área Ailembata entre joven iha aldeia Darlari no aldeira Beli husi suku Balulu,” informa Segundu Komadante PNTL, eskuadra Uatulari, Sargentu Polísia, Francisco Fernandes Menezes, ba TATOLI, iha postu Uatulari, ohin.
Ho kazu ne’e, PNTL konsege detein suspeitu na’in-rua ho inisiál AS no OCL no kazu danu simples detein autor ida, nune’e ba rejista ona iha Ministériu Públiku atu prosesu tuir lei.
Kona-ba kazu danu simples ne’ebé akontese iha loron (30/12) tuku 17:00, iha área Naedala, aldeia Osocaiwa suku Afaloikai rezulta postu Saúde Naedala nia meza administrasaun ka meza rejistu pasiente ida hetan rahun totál.
Enkuantu, kazu asaltu malu iha área Ailembata suku Babulo joven sira husi aldeia Daralari mak ba asaltu komunidade iha Aldeia Beli nian hodi rezulta komunidade nia-uma no karreta rahun.
“Iha Akontese referida rezulta Kareta ida vidru parte karuk Odamatan kotuk nian rahun no Feto ida hetan tuda kona nia liman kabas parte los sai bubu no fitar tiha, uma ida mós hetan tuda. Ami rekolla ona dadús no arguidu nain-rua agora asegura hela iha sela eskuadra Uatulari”, nia subliña.
Durante selebrasaun, nia dehan PNTL Viqueque liuliu Esquadra Uatulari halo intervensaun rapida iha lokál krime, konsege hakalma situansaun.
Tuir dadús totál membru PNTL servisu iha Esqadra Uatulari na’in-17, husi númeru ne’e membru nain- tolu moras no kontinua hala’o tratamentu saúde rutina. Nune’e membru ativu hela nain-14 no nain-neen hein reforma.
Notisia relevante: PNTL suspeita autór na’in-tolu uza kilat anin hakanek vítima OF iha Gariuai
Jornalista : Vitorino Lopes da Costa
Editór : Florencio Miranda Ximenes