COVALIMA, 07 Janeiru 2025 (TATOLI) – Servisu Munisipál Asaun Sosiál (SMAS) Covalima presiza sosa karreta funeráriu ida, tanba karreta ho xapa mátrikula G 05828 nia kondisaun ladi’ak atu transporta mate-isin husi munisípiu bá postu administrativu hitu ne’ebé pertense ba munisípiu ne’e.
Diretór Servisu Munisipál Asaun Sosiál, Clementino Ber, dehan karru funeráriu ne’ebé agora iha tama ona prosesu leilaun, tanba kle’ur ona no bainhira obriga bele fó risku ba ema nia vida.
“Planu atu sosa ida, tanba karru funeráriu iha Covalima hamutuk tolu de’it, bainhira iha halo lelaun hela de’it rua, nune’e la to’o atu halo atendimentu hodi transporta mate-isin bá postu administrativu Fatululik, Fohorem, Fatumea, Tilomar, Maucatar, Suai no Zumalai”, Clementino Bere hateten iha Barru Costa, ohin.
Prosesu atu halo leilaun ba karru funeráriu ida-ne’e entrega ba patrimónu no lojístiku husi munisípiu, tanba parte SMAS relata de’it kondisaun karreta katak labele uza atu transporta mate-isin.
Iha Orsamentu Jerál Estadu 2025 aloka ba SMAS hamutuk $133.156 hodi finansia atividade haat no subprograma rua. Nune’e, planu atu sosa karru funeráriu iha ona orsamentu, maibé seidauk hatene montante atu sosa karreta ne’e.
Planu Asaun Anuál SMAS 2025 iha nia subprograma rua mak asaun sosiál no abordajen jéneru ho nia atividade mak realizasaun servisu funeráriu públiku, apoia nesesidade edukativa, atividade fortalesimentu sosioekonómiku ba feto no atividade kompaña informasaun violénsia doméstika iha postu sira.
“Planu atu sosa karru funeráriu fiksu, tanba ida nia kondisaun atu hamoris ne’e motorista sira dudu de’it no labele transporta mate-isin bá postu administrativu, maibé halo movimentu de’it iha kapitál munisípiu nian”, salienta.
Notísia relevante: Asaun Sosiál gasta $11.135 sosa kaixaun hodi tulun família matebian
Jornalista: Celestina Teles
Editora: Maria Auxiliadora
