COVALIMA, 07 Janeiru 2025 (TATOLI) – Polísia Nasionál Timor-Leste (PNTL) munisípiu Covalima liuhusi seksaun tránzitu arrekada, entre Janeiru-Dezembru 2024, reseita hamutuk $21.503 ba kofre Estadu.
Komandante PNTL Covalima, Superintendente Polísia Calisto Gonzaga, informa reseita ne’e mai husi infratór sira ne’ebé uza karreta no motorizada, ne’ebé kontra Lei Kódigu Estrada nune’e PNTL aplika lei ne’e ba sira.
Calisto Gonzaga salienta katak reseita ne’ebé PNTL Covalima rekolla iha 2024 boot kompara ho 2023 tanba hetan de’it rihun $14.
“Iha 2025, ita mantein ita-nia serbisu liga ba kódigu estrada nian atu fó hanoin ba sidadaun sira ne’ebé sosa motorizada no karreta liuhusi dalan kontrabandu, entaun PNTL apreende sira-nia transporte”, nia fó hanoin.
Tanba ne’e, komandu fó hanoin ba sidadaun sira ne’ebé uza motorizada no karreta ilegál sira atu kuidadu, tanba 2025 ne’e PNTL halo pasa revista ho rigór nune’e bele redús númeru transporte ilegál.
Aleinde kontribui reseita, PNTL mós rejista asidente 37, husi númeru ne’e 21 mak kategoria ho tipu grave tanba karreta baku fila iha Abríl iha autoestrada, nune’e sidadaun na’in-haat lakon vida.
“Ho asidente ne’ebé akontese, ita apreende [karreta] tanba sidadaun sira sosa karreta la kuidadu. Ita fó importánsia hodi haree kondisaun karreta hanesan roda no seluk tan, nune’e labele fó impaktu ba ema nia vida”, dehan.
Notísia relevante: PNTL Covalima rejista kazu hitu durante selebrasaun Natál no tinan foun
Komandu mós alerta ba motorista no kondutór sira labele lori transporte ho kondisaun lanu no fuma sigarru, tanba bainhira PNTL hetan sei aplika sansaun ba sira, nune’e evita infrasaun ki’ik sira ne’e.
Jornalista: Celestina Teles
Editora: Maria Auxiliadora