iklan

HEADLINE, POLÍTIKA

Governu hakarak estabelese parseria estratéjika kona-ba kooperasaun militár internasionál

Governu hakarak estabelese parseria estratéjika kona-ba kooperasaun militár internasionál

Primeiru-Ministru, Kay Rala Xanana Gusmão, prezide reuniaun Konsellu Ministru, iha Palásiu Governu, kuarta (08/01). Imajen Tatoli/Francisco Sony

DILI, 08 janeiru 2025 (TATOLI)—Ministru Defeza, Donaciano do Rosário Gomes, aprezenta projetu rezolusaun Governu kona-ba referensiál polítika kooperasaun internasionál, iha ámbitu reuniaun ordinária Konsellu Ministru (KM) ordinária, kuarta ne’e.

“Referensiál ida-ne’e hanesan dokumentu estruturante no orientadór ida hodi estabelese parseria estratéjika sira kona-ba kooperasaun militár internasionál, liuhusi referensiál ne’e promove matadalan no liña asaun lubun ida ho objetivu atu define forma no regra sira kooperasaun nian nune’e bele otimiza kapasidade ne’ebé FALINTIL-Forsa Defeza Timor-Leste (F-FDTL) iha,” Ministru Prezidénsia Konsellu Ministru, Agio Pereira, informa, hafoin ramata reuniaun ezekutivu, iha Palásiu Governu.

Iha ámbitu kooperasaun internasionál iha área defeza, promove mós kriasaun Gabinete Koordenasaun Polítika Internasionál Kooperasaun, ne’ebé depende direta ba membru Governu ne’ebé responsável ba área defeza, ho misaun atu jere no koordena kooperasaun hotu ho nasaun belun sira.

Notísia relevante : PR Horta fó hanoin Governu kona-ba kooperasaun internasionál iha área defeza

Alinde ne’e, Primeiru-Ministru, Kay Rala Xanana Gusmão, halo aprezentasaun ida kona-ba programa lejizlativu IX Governu nian.

Programa ida ne’e sei elabora tuir proposta sira ne’ebé membru KM aprezenta no hanesan previzaun ida kona-ba intervensaun lejizlativa Governu nian, ne’ebé organiza tuir setór no prioridade, ba períodu tinan 2025.

Ikusliu, Ministra Finansa, Santina José Rodrigues F. Viegas Cardoso, halo aprezentasaun ida ba KM kona-ba regras ezekusaun Orsamentu Jerál Estadu ba tinan 2025, ne’ebé estabelese tuir dekretu-lei Númeru. 43/2024 loron 20 dezembru.

Jornalista      : Arminda Fonseca

Editora           : Julia Chatarina

iklan
iklan

Leave a Reply

iklan
error: Content is protected !!