DILI, 08 janeiru 2025 (TATOLI)—Governu liuhusi reuniaun Konsellu Ministru (KM) ordinária, kuarta ne’e, deside fó doasaun ho valór millaun $2 ba Repúblika Vanuatu ne’ebé sofre dezatre naturál ka rai nakdoko iha loron 17 dezembru 2024 liubá.
“Reuniaun dahuluk 2025 nian Konsellu Ministru deside atribui millaun $2 ba Vanuatu ne’ebé iha loron 17 dezembru2024 Vanuvatu hetan sofre rai nakdoko ho nia magnitude 7,3 kauza ema na’in 23 mate no na’in-200 resin hetan kanek inklui destruisaun infraestrutura hanesan Ospitál Sentrál no rezevatóriu bee rua,” Ministru Prezidénsia Konsellu Ministru, Agio Pereira, informa hafoin reuniaun ezekutivu, iha Palásiu Governu.
Notísia relevante : Vanuatu hakarak estabelese kooperasaun ho Timor-Leste iha área marrítima
Governu Timor-Leste konsidera doasaun ne’e importante tanba haree ba pasadu nasaun Vanuatu ajuda no apoiu tebes ba Timor-Leste nia luta ukun rasik-an nian iha Nasaun Unida nia oin.
Ezekutivu rekoñese mós katak urjénsia ba apoia populasaun sira ne’ebé afetadu no harii hikas área sira ne’ebé naksobu, desizaun ida-ne’e hatudu kompromisu Konstitusionál Repúblika Demokrátika Timor-Leste nian ba solidariedade no kooperasaun entre povu sira.
Antes ne’e, líder Vanuatu hatudu ona vontade atu estabelese kooperasaun bilaterál ho Timor-Leste iha área marrítima no seluk tan.
Jornalista : Arminda Fonseca
Editora : Julia Chatarina