iklan

HEADLINE, POLÍTIKA

KM aprova Rezolusaun tolu ne’ebé sei submete ba Parlamentu

KM aprova Rezolusaun tolu ne’ebé sei submete ba Parlamentu

Primeiru-Ministru, Kay Rala Xanana Gusmão, prezide reuniaun Konsellu Ministru, iha Palásiu Governu, kuarta (08/01). Imajen Tatoli/Francisco Sony

DILI, 08 janeiru 2025 (TATOLI)Vise-Ministra ba Asuntu ASEAN, Milena Maria da Costa Rangel, liuhusi reuniaun Konsellu Ministru (KM) ordinária, kuarta ne’e, aprezenta projetu proposta Rezolusaun tolu kona-ba ratifikasaun akordu sira ne’ebé Governu sei submete ba Parlamentu Nasionál.

Rezolusaun tolu ne’e hetan ona aprovasaun iha reuniaun ezekutivu.

“Proposta rezolusaun tolu ne’e mak kona-ba ratifikasaun akordu sira hanesan akordu servisu aéreu ho Repúblika Populár Xina no Reinu Kamboja inklui akordu Izensaun vistu ho Repúblika Demokrátika Populár Laos,” Ministru Prezidénsia Konsellu Ministru, Agio Pereira, informa hafoin reuniaun ezekutivu, iha Palásiu Governu.

Notísia relevante : PN ratifika akordu izensaun vistu ho Filipina-Vietname-Índia

Nia dehan, akordu servisu aéreu ho Repúblika Xina no Kambódia ho objetivu atu hametin relasaun amizade no kooperativa ho nasaun rua ne’e, nune’e mós kontribui ba dezenvolvimentu setór transporte aéreu nian.

Ho promosaun interkámbiu komersiál no aumenta ligasaun aérea regulár sira, akordu sira ne’e ho intensaun atu haburas kreximentu ekonómiku no promove turizmu.

Akordu sira ne’e mós aliña ho Timor-Leste nia prosesu adezaun nu’udar membru plenu ba ASEAN no ho polítika ‘Céu Aberto’ organizasaun nian.

Ikus liu, akordu izensaun Vistu ho Repúblika Demokrátika Populár Laos estabelese izensaun vistu ba objetivu turístiku ba titulár pasaporte komún nian hodi permite entrada no estadia to’o loron 30.

Medida ne’e ho objetivu atu hametin relasaun di’ak amizade no kooperasaun entre nasaun rua ne’e, aleinde fasilita interkámbiu turístiku no kumpre instrumentu sira ASEAN kona-ba rekoñesimentu resíproku ba pasaporte.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!