iklan

POLÍTIKA

Komisaun G sei fó prioridade altera Lei Baze Edukasaun

Komisaun G sei fó prioridade altera Lei Baze Edukasaun

Prezidente Komisaun G trata asuntu Edukasaun, Juventude, Desportu no Kultura iha Parlamentu Nasionál (PN), Deputadu Armando dos Santos Lopes. Imajen Tatoli/Nelson de Sousa.

DILI, 08 janeiru 2025 (TATOLI)—Komisaun G trata asuntu Edukasaun, Juventude, Kultura no Sidadania iha Parlamentu Nasionál (PN), sei fó prioridade altera Lei Baze Edukasaun númeru 14/2008, 29 outubru, iha tinan ne’e.

Notísia Relevante: PN aprova proposta-lei Baze Ensinu Superiór iha finál globál

‘’Ohin, enkontru dahuluk komisaun G, ne’ebé ami ko’alia kona-ba atividade rua (2). Ida (1), ko’alia programa komisaun nian ne’ebé hahú husi janeiru to’o iha jullu, atividade atu kontinua hala’o fiskalizasaun ba progarma sira ne’ebé Governu implementa. Rua, ami ko’alia oinsá atu kontinua ko’alia Lei Baze Edukasaun ba pre-eskolár to’o iha sekundáriu jerál ho tékniku vokasioná. Hanesan ita hatene hotu katak, foin daudaun ita halo separasaun entre lei baze edukasaun pre-eskolár to’o sekundáriu jerál. Husi Ministériu Ensinu Superiór no Kultura (MESSK) agora ketak,” Prezidente komisaun G, Armando Lopez, informa ba jornalista sira hafoin ramata reuniaun komisaun iha PN, kuarta ne’e.

Tanba, nia dehan, iha reuniaun komisaun nian ne’e ko’alia programa prioridade tinan 2025 bele prodús tan lei baze edukasaun ba pre-eskolár ho sekundáriu jerál no tékniku vokasionál.

Ba inisiativa lejislasaun ne’e, tuir planu komisaun sei halo audiénsia públika iha fulan-fevereiru ho manorin sira iha territóriu hodi rona sira ninia hanoin mós, tanba sira mak implementadór edukasaun iha baze.

Aleinde ne’e halo audiénsia mós ho diretór edukasaun munisípiu sira no Ministériu Edukasaun no entidade relevante sira seluk.

Nia hateten, atu prodús lejislasaun ne’e la’ós lei foun, maibé kontinua ho lei atuál no artigu balun ne’ebé haree presiza tenke halo alterasaun no balun presiza halo revogasaun, no iha buat balun presiza aumenta tanba presiza tuir evolusaun ne’ebé la’o daudaun.

“Konteúdu alterasaun saida mak mosu mai ne’e, sei liuhusi audiénsia públika no lei ne’e foku loos de’it ba pre-eskolár, sekundáriu jerál ho tékniku vokasionál ho ensinu báziku,” nia hateten.

Nune’em tuir nia, intensaun ne’ebé iha atu bele mellora liután setór edukasaun iha rai-laran.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!