DILI, 08 janeiru 2025 (TATOLI)—Governu liuhusi Solidariedade Sosiál no Inkluzaun (MSSI) halo ona pagamentu ba benefisiáriu hamutuk 68.896 ba programa Bolsa da Mãe Kondisionál, iha territóriu tomak.
“Família ne’ebé haree labarik ne’e hamutuk 34.000-resin no totál labarik husi Ensinu Primária to’o Sekundária hamutuk 68.896. Ida-ne’e labarik idade eskolár sira ho nia osan hamutuk millaun $7-resin,” Diretór Jerál MSSI, Florêncio Pina, informa ba Agência Tatoli, hafoin partisipa iha lansamentu korresaun buletin asesu ba Universidade Nasionál Timor Lorosa’e (UNTL) no Institutu Politékniku Betano (IPB), iha salaun Ministériu Ensinu Superiór Siensia no Kultura (MESSK), Colmera, kuarta ne’e.
Notísia relevante : MSSI no BNCTL asina akordu ba implementasaun Bolsa da Mãe Kondisionál
MSSI nafatin kontinua programa ne’e iha tinan 2025 no iha planu hahú fali halo verifikasaun nune’e iha tirmestrál dahuluk bele identifika benefisiáriu hodi halo pagamentu.
“Tanba iha trimestrál dahuluk ne’e ita planu no tama trimestrál daruak ita hahú halo pagamentu. Agora ita iha tinan ne’e iha programa rua kondisionál liga ba edukasaun nian nomós koordena ho Ministériu Ensinu Superiór Siensia no Kultura, ne’ebé ema vulnerável mós bele asesu ba ensinu superiór iha tinan ne’e. Ita identifika ona ema hamutuk 300 maibé ida-ne’e Ministériu mak sei deside tama ka lae, presiza teste ka oinsá, ida-ne’e Ministériu nia kompeténsia,” nia akresenta.
Programa apoiu kondisionál Bolsa da Mãe ne’e hodi garante katak bele proteje no apoia labarik sira neʼebé kiak liu no iha impaktu ba tempu badak, médiu no naruk.
Subsídiu apoiu kondisionál ne’e aprezenta valór subsídiu mensál ne’ebé la hanesan, husi $8 to’o $10, bazeia ba labarik benefisiáriu sira-nia siklu eskolár hodi insentiva durante prosesu ensinu eprendizajen.
Aleinde ne’e, valór sira ne’ebé aloka ba labarik sira ne’ebé ho defisiénsia iha idade eskolár no frekuenta eskola aumenta $5, ne’ebé subliña kompromisu Governu hodi promove ekuidade.
Benefisiáriu ne’ebé sei hetan subsídiu husi programa Bolsa da Mãe Kondisionál antes ne’e hamutuk 69.571, ho totál orsamentu $7.066.596 maibé hafoin halo ajusta iha mudansa ba númeru benefisiáriu.
Governu aloka orsamentu hamutuk $6.642.777 ba Bolsa da Mãe Kondisionál iha tinan 2024, ba benefisiáriu hamutuk 54,688, hahú husi nível edukasaun primária, pre-sekundária no sekundária, ho totál orsamentu $5.580.960.
Benefisiáriu husi munisípiu 10 inklui Rejiaun Administrativu Eapesiál Oé-cusse Ambeno (RAEOA) mak hanesan ba Aileu totál benefisiáriu husi primária, pre-primária to’o sekunária hamutuk 3.431 ho totál orsamentu $349.344, Ainaro iha benefisiáriu 5.324 ho totál orsamentu $557.976, Baucau iha benefisiáriu 6.392 ho totál orsamentu $659.196, Bobonaro iha benefisiáriu 6.343 ho totál orsamentu $656.592.
Ba munisípiu Covalima iha benefisiáriu 5.142 ho totál orsamentu $521.064, Ermera iha benefisiáriu 4.748 ho orsamentu $488.892, Lautém iha benefisiáriu 4.928 ho totál orsamentu $505.116, Liquiçá iha benefisiáriu 1.594 ho orsamentu $310.296, Manatuto iha benefisiáriu 3.750 ho orsamentu $370.800, Manufahi iha benefisiáriu 4.830 ho orsamentu $504.768 no RAEOA iha benefisiáriu 6.638 ho orsamentu $656.916.
Programa Bolsa da Mãe Kondisionál nu’udar programa Governu ne’ebé kontinua implementa hahú husi tinan 2008, bazeia ba dekretu-lei númeru 18/2012, 04 abríl.
Dekreitu-lei ne’e hetan alterasaun iha janeiru 2024 hodi halo mudansa ba montante orsamentu ba benefisiáriu sira liuhusi dekretu-lei númeru 1/2024, 03 janeiru, iha artigu 10 no artigu 11 ne’ebé deskreve mudansa ba montante orsamentu no akresenta liután kondisionalidade eskola ba benefisiáriu sira.
Jornalista : Osória Marques
Editora : Julia Chatarina