OÉ-CUSSE, 08 Janeiru 2025 (TATOLI) – Autoridade Aduaneira (AA) ka Alfándega Rejiaun Administrativa Espesiál Oé-Cusse Ambeno (RAEOA) falta funsionáriu no ekipamentu atu serbisu, tanba ne’e nesesita atu aumenta rekursu sira ne’e.
“Ami presiza rekursu umanu no ekipamentu tanba menus tebes iha postu integradu Sakato no postu sira seluk. Barak mak la funsiona tanba ekipamentu sira-ne’e mak atu rekolla taxa hanesan komputadór no x-ray. Ida-ne’e obstákulu ba ami durante ne’e”, Diretór Alfándega Oé-Cusse, Joaquim Gonçalves dos Reis, relata ohin.
Nia rekomenda mós ba Governu no Autoridade RAEOA atu iha futuru bele kapasita funsionáriu sira iha rai-laran no li’ur, nune’e bele hasa’e koñesimentu, tanba iha Governu anteriór Alfándega RAEOA laiha oportunidade atu hetan formasaun ruma.
Notísia relevante: Alfándega Oé-Cusse rekolla reseita rihun $468-resin
“Asuntu ne’e ha’u hato’o beibeik ona liuhusi ami-nia relatóriu, ami submete ba iha nasionál no Autoridade RAEOA atu konsidera. Ami husu mós atu iha edifísiu tanba fatin ne’e fasilidade balun aat ona”, nia hateten.
Aleinde problema rekursu umanu no materiál, postu Alfándega Oé-Cusse durante ne’e fó atendimentu ba sidadaun sira husi rai-laran no li’ur ho sistema manuál.
“Tuir loloos Alfándega Oé-Cusse hanesan mós ho nasionál utiliza sistema modernu Asycuda World, maibé sei nafatin ho Asycuda ++ ka sistema manuál”, katak.
Jornalista Tatoli tenta konfirma asuntu ne’e ho Prezidente Autoridade RAEOA, Rogério Lobato, maibé laiha fatin tanba daudaun ne’e hala’o hela serbisu iha Dili.
Notísia relevante: Alfándega Oé-Cusse presiza laboratóriu kona-bá teste produtu importasaun
Totál funsionáriu iha Alfándega Oé-Cusse hamutuk na’in-81, kompostu husi kontratadu 71 no permanente 10.
Rekorde katak Autoridade Aduaneira RAEOA rekolla, entre Janeiru no Novembru tinan kotuk, reseita hamutuk $468.886 ba kofre Estadu.
Jornalista: Abílio Elo Nini
Editora: Maria Auxiliadora