OÉ-CUSSE, 16 Dezembru 2024 (TATOLI) – Entre Janeiru no Novembru 2024, Autoridade Aduaneira (AA) ka Alfándega Rejiaun Administrativa Espesiál Oé-Cusse Ambeno (RAEOA) rekolla reseita $468.886 ba kofre Estadu.
“Ami fiar katak to’o Dezembru remata, ita sei hetan rihun $500-resin”, Diretór Alfándega RAEOA, Joaquim Gonçalves dos Reis, hateten iha fronteira Sakato, Oé-Cusse, ohin.
Dirijente Autoridade Aduaneira ne’e informa katak taxa ne’e dalaruma tun no sa’e, konforme haree ba volume importasaun ne’ebé iha no taxa ne’e mós parte Alfándega sempre submete relatóriu ba Prezidente Autoridade RAEOA, Rogério Lobato, no ba Governu sentrál.
Notísia relevante: Alfándega rekolla reseita millaun $45 iha semestre dahuluk
Nia informa katak iha trimestre dahuluk rekolla $65.254,76, daruak $199.631 no trimestre datoluk rekolla $145,382.50. Iha trimestre dahaat rekolla ona fulan rua hamutuk $58.617,50 (Outubru $31.726,50 no Novembru $26.891).
“Reseita sira-ne’e ita rekolla liuhusi tipu tolu husi importasaun normál nian mak hanesan sales, ecxise no import temporary”, nia esplika.
Notísia relevante: Alfándega hatama reseita millaun $21-resin iha fulan-tolu
Diretór Autoridade Aduaneira ne’e espera katak ba futuru Governu bele funsiona mós fronteira sira iha sub-rejiaun Oesilo, Pássabe no Nítibe, nune’e bele aumenta taxa ba kofre Estadu.
“Taxa ne’ebé ami rekolla husi odamatan ida de’it mak Sakato, enkuantu husi Oésilo, Pássabe no Nítibe seidauk funsiona. Ita fiar katak Governu sei funsiona iha tinan hirak tuirmai, liuliu Oésilo nune’e ita-bele rekolla reseita mós”, nia dehan.
Tuir dadus AA nasionál, to’o 10 Dezembru tinan ne’e, Alfándega kontribui ona reseita millaun $100-resin ba kofre Estadu. Kolesaun reseita ne’e mai husi sasán importadu ne’ebé tama iha fronteira sira hanesan Batugadé, Salele, aeroportu no portu Tíbar.
Notísia relevante: Autoridade Aduaneira kontribui reseita millaun $100-resin ba kofre Estadu
Jornalista: Abílio Elo Nini
Editora: Maria Auxiliadora
