DILI, 08 janeiru 2025 (TATOLI)–Universidade Nasionál Timor-Lorosa’e (UNTL) no Institutu Politékniku Betano (IPB) submete ona lista estudante foun hamutuk 4.494 ba Ministériu Ensinu Superiór Siénsia no Kultura (MESSK) ba tinan letivu 2025.
Númeru estudante ne’e kompostu husi UNTL 4095 no IPB 400.
“UNTL atu simu na’in hira ami seidauk hatene, maibé ami propoin proposta ba Ministériu Ensinu Superiór ba anu letivu 2025 ne’e hamutuk 4.095, ne’e proposta mai husi fakuldade 10,” Reitór UNTL, João Soares Martin, informa iha salaun MESSK, kuarta ne’e.
Reitór garante iha espasu sufisiente tanba kada tinan universidade públiku ne’e gradua estudante barak.
“Ita presiza aumenta fasilidade, no entanto tinan-tinan númeru ne’ebé ami prevee ne’e iha mós estudante ne’ebé mak gradua, entaun bele apar ho fasilidade ne’ebé iha, signifika iha espasu ba estudante foun sira atu apreende tanba kada tinan iha estudante sira gradua ne’e ho númeru boot,” nia akresenta.
Notísia relevante : MESSK rejista estudante 173 asesu ba rejime espesiál UNTL no IPB
Iha sorin seluk, Prezidente IPB, Acâcio Cardoso Amaral, hateten, institutu ne’e iha fakuldade rua, ne’ebé kada fakuldade iha vaga ba estudante 200.
“Tinan-tinan IPB prevee vaga 400 ba kursu rua, kursu konstrusaun sivíl no produsaun animál, agora sei faze korresaun hela, ami la hatene hira mak sei liu, maibé ami espera katak vaga 400 ne’e bele prense hotu, no ami hein katak bainhira sira liu ona bele ba ona iha IPB, tanba tinan-tinan iha rezultadu publikasaun ne’e 400 maibé to’o ba iha ne’ebá ne’e la to’o númeru ne’e. Ha’u husu ba kandidata sira ne’ebé karik liu, favór ida bele bá tanba tinan ida-ne’e ita komesa ona ho diploma 3,” Prezidente institutu, hato’o.
Nia garante, fasilidade ba prátika no aprendizajen ne’ebé eziste naton ona ba estudante sira atu utiliza.
“Fasilidade ne’ebé IPB iha naton ba prátika maibé klaru ami presiza investimentu barak liután para investe iha laboratóriu no sala aula sira, maibé fasilidade sira ne’ebé daudaun ne’e iha sufisiente,” Acâcio Cardoso Amaral, katak.
Diretóra Jerál MESSK, Maria Fernanda Lay, hateten, boletin ba rejime espesial ne’ebé MESSK fahe hamutuk 27.392 no estudante sira ne’ebé konsege prense boletin hamutuk 12.175 no la prinse 14.429.
“Ba rejime jerál tuir dadus ne’ebé ami iha no boletin ne’ebé ami fahe mak 27.392, no sira ne’ebé konsege prense boletin mak 12.175, ne’e sira ne’ebé mak prense tuir nota mínima ne’ebé mak instituisaun públika rua fó no sira ne’ebé la prense 14.429. Atu dehan katak ita-nia Joven barak mak la prense boletin,” nia tenik.
Rejime espesiál hamutuk 1.374 maibé aplikante ne’ebé sei tuir teste hamutuk 1.238.
“Estudante sira ne’ebé mak pasa atu asesu ba iha instituisaun públika rua ne’e, ita sei dada husi nota ne’ebé a’as liu tun to’o vaga ne’ebé disponível,” nia informa.
Jornalista : Osória Marques
Editora : Julia Chatarina