iklan

KOVALIMA, HEADLINE

Covalima rejista seropozitivu na’in-90

Covalima rejista seropozitivu na’in-90

Ilustrasaun teste moras HIV/SIDA. Imajen/espesiál

COVALIMA, 09 Janeiru 2025 (TATOLI) – Servisu Saúde Munisipál (SSM) Covalima rejista ema na’in-90 mak sofre moras VIH/Sida, informa Koordenadór Servisu Saúde Covalima, João Ramalho.

Nia dehan SSM Covalima identifika seropozitivu sira ne’e bainhira halo teste ba pasiente rihun 6 dezde tinan 2012.

“Ita hateten dadus kumulativu pasiente HIV iha Covalima hahú 2012 to’o 2024 hamutuk 90. Husi númeru ne’e pasiente na’in-42 mak ativa halo tratamentu iha ospitál referénsia Suai, halo transferénsia na’in-15 [bá nasionál], ida mate no na’in-rua dropout”, João Ramalho informa iha salaun AMC, ohin.

Pasiente ne’ebé sofre VIH/Sida ne’e maioria ho idade entre 24 no 40 no seluk entre tinan 15 no 20. Aleinde ne’e, iha mós labarik idade tinan haat mai kraik, tanba hada’et husi nia inan.

Responsavel programa ne’e dehan ho númeru kazu ne’ebé iha, Servisu Saúde Covalima nafatin esforsu atu hakotu liña tranzmisaun VIH/Sida husi ema ida ba ema seluk. Tanba ne’e, Ministériu Saúde no líder komunitáriu sira presiza atu serbisu maka’as hodi fahe informasaun ba komunidade oinsá mak bele prevene aan husi moras ne’e.

Tuir nia, moras ne’e susar atu elimina no nia dalan mak nafatin sensibiliza joven no komunidade hodi hasa’e sira-nia koñesimentu no presiza kontrola maka’as fronteira atu Evita sidadaun tama-sai ho dalan ilegál.

Xefe Sentru Saúde Fatululik, Alberto Ferreira Noronha, dehan pesoál saúde ne’ebé serbisu iha sentru saúde sira mós halo teste ba pasiente sira-nia raan bainhira hetan sintoma husi moras VIH/Sida.

“Ami mós halo teste ba pasiente sira-nia raan iha laboratóriu. Bainhira pasiente sira halo konsulta iha sentru saúde mak ami identifika sintoma husi moras VIH/Sida, ami la halo tratamentu maibe transfere kedan bá Ospitál Referénsia Suai”, nia informa.

Tuir dadús, númeru VIH/Sida iha Timor-Leste hamutuk 2.148, ne’ebé rejista aas iha munisípiu sira mak hanesan Dili, Bobonaro, Covalima, Oé-Cusse no Baucau.

Notísia relevante: ONG Estrela+ identifika seropozitivu 263 hetan stigma no diskriminasaun husi sosiedade

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!