DILI, 09 janeiru 2025 (TATOLI)–Fundu Dezenvolvimentu Kapitál Umanu (FDCH, sigla portugés) asina ona akordu ho Asia Pacific University of Technology & Innovation (APU) no Education Malaysia Global Services (EMGS) hodi serbisu hamutuk fó bolsa estudu ba timoroan sira atu kontinua estudu iha Malázia.
“Objetivu husi estabelesimentu akordu ho APU no EMGS ne’e hodi serbisu hamutuk iha parte dezenvolvimentu kapitál umanu Timor-Leste, liu-liu iha programa bolsa estudu. Kada tinan FDCH sei haruka timoroan sira ne’ebé hetan bolsa estudu hala’o estudu iha Malázia,” Diretór Ezekutivu FDCH, Júlio Aparício informa iha ninia knaar fatin, Colmera, kinta ne’e.
Daudaun ne’e iha bolseiru na’in-sia mak kontinua estuda iha nível lisensiatura no balun mestradu no APU, na’in-neen iha nível lisensiatura no mestradu na’in-tolu iha área enjeñaria mekatrónika, artificial intelligence, computer and analytics science, and finance.
“APU nu’udar universidade ne’ebé ho vizaun atu sai universidade líder ida iha teknolojia no inovasaun ne’ebé transforma estudante sira sai profisionál no kompetente iha futuru. Tanba ne’e daudaun ne’e ita-nia bolseiru na’in-sia mak hala’o sira-nia estudu iha ne’ebá,” nia akresenta.
Notísia relevante : FDCH sujere ME atensaun ba ESJ hodi kompete iha bolsa estudu
Aleinde ne’e, instituisaun ne’e estabelese ona akordu kooperasaun ho Institutu Jeosiénsia Timor-Leste (IGTL, sigla portugés) hodi implementa bolsa estudu.
“Objetivu husi estabelesimentu akordu kooperasaun serbisu husi instituisaun Estadu rua ne’e atu atribui bolsa estudu ba timoroan sira atu kontinua estudu iha área sira ne’ebé ligadu ho misaun no papel IGTL hodi promove edukasaun no dezenvolvimentu rekursu umanu iha área jeolojia nian,” Diretór katak.
Jornalista : Osória Marques
Editora : Julia Chatarina
