iklan

DESPORTU, POLÍTIKA

Komisaun G husu Governu halo preparasaun másimu realiza jogu CPLP

Komisaun G husu Governu halo preparasaun másimu realiza jogu CPLP

Emblema jogu CPLP iha Timor-Leste. Imejen/Mídia MJDAK.

DILI, 09 janeiru 2024 (TATOLI)—Deputadu membru komisaun G trata asuntu Edukasaun, Juventude, Kultura no Sidadania iha Parlamentu Nasionál (PN), Mateus da Crus, rekomenda Governu Konstitusionál da-sia (IX) liuhusi Ministériu Juventude Desportu, Arte no Kultura (MJDAK) atu halo preparasaun másimu hodi bele fó susesu realiza eventu internasionál jogu CPLP.

Notísia Relevante: KM Autoriza Utilizasaun Orsamentu $511.250 ba Preparasaun Jogu CPLP

“Eventu ne’e preparadu kle’ur ona, iha tinan hirak liu-bá ita adia tanba situasaun COVID-19 ne’ebé tinan ida-ne’e mak realiza. Nune’e, rekomendasaun ne’ebé ita fó dahuluk mak liuliu ita tenke haree ba infraestrutura desportu utiliza ba jogu CPLP nian,” Nia hateten ba Agência TATOLI iha resintu PN.

Aleinde, ne’e membru husi órgaun lejislativu ne’e husu mós halo preparasaun di’ak hodi simu delegasaun sira atu partisipa iha eventu ne’e hodi haree ba ótel, transporte, protokólu, seguransa nune’e oinsá simu ema tenke haree didi’ak.

Deputadu membru komisaun G trata asuntu Edukasaun, Juventude, Kultura no Sidadania iha Parlamentu Nasionál (PN), Mateus da Crus. Imajen TATOLI/Nelson de Sousa.

Nia sujere, presiza prepara tradutór sira hodi akompaña delegasaun nasaun ko’alia lian portugés sira-ne’ebé mai partisipa jogu CPLP iha Timor-Leste ne’e.

Tuir nia, modalidade sira husi Timor-Leste kuaze preparadu no nia sujere ministériu relevante presiza prepara mak iha fatin ba sentru treinamentu, nune’e modalidade sira-ne’ebé iha bele iha konsentrasaun antes fulan ida ka rua hodi iha preparasaun di’ak tuir kompetisaun.

‘’Husu ministériu relevante atu hala’o koordenasaun hodi halo preparasaun másimu fó susesu realiza eventu ne’ebé sei mai,” nia rekomenda.

Tanba ne’e, nia dehan, komisaun ko’alia ona ho Ministériu Juventude, Desportu, Arte no Kultura (MJDAK) atu haree situasaun sira-ne’e, tanba ema hotu hakarak eventu jogu CPLP ne’e la’o ho susesu.

Komisaun G sei bolu fila-fali MinistruJuventude, Desportu, Arte no Kultura (MJDAK), Nélio Isaac Sarmento, hodi ko’alia kona-ba preparasaun atu realiza eventu ne’e.

Tanba ne’e, tuir planu, tersa (09 janeiru 2024) ohin, komisaun sei hala’o sorumutu ho Governante área tutela hodi rona liután preparasaun Governu nian atu realiza eventu internasionál ne’e.

Tuir planu, komisaun sei vizita hodi halo fiskalizasaun atu haree kondisaun infraestrutura desportu nian liuliu kampu sira-ne’ebé daudaun iha atu utiliza ba jogu refere.

Membru PN ne’e konsidera, jogu CPLP ne’e sei hametin liu impaktu di’ak iha ligasaun ho nasaun CPLP tanba Timor-Leste foin dahuluk organiza eventu ne’e, ho nune’e Governu presiza organiza ho didi’ak.

Notísia Relevante: Membru PN husu Governu halo preparasaun másimu ba eventu jogu CPLP

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!