DILI, 09 Janeiru 2025 (TATOLI) – Ministru Defeza (MD), Donanciano do Rosário Gomes ‘Pedro Klamar Fuik’, planu atu kria komisaun instaladora hodi tau-matan ba konstrusaun Ospitál Militár, tanba Governu Xina konkorda atu halo obra ne’e iha tempu badak.
“Ita sei instala komisaun ida atu tau-matan ba konstrusaun ospitál militár ne’ebé hetan doasaun husi Xina. Horisehik ha’u simu informasaun husi sira katak sedu ou tarde sira sei aviza mai para hotu-hotu hatene hodi tama ba prosesu lansa primeira pedra ba konstrusaun Ospitál Militár”, Pedro Klamar Fuik hateten ba jornalista sira iha Kuartél Jenerál F-FDTL Fatuhada, ohin.
Ospitál Militár ne’e sei konstrui iha edifísiu Kuartél Jenerál F-FDTL nia kotuk iha rai ektare ida ho andar ualu.
IX Governu Konstitusionál iha programa ida atu harii Ospitál Militár iha tinan ida-ne’e no Xina hato’o prontidaun katak sira hakarak fó doasaun liuhusi harii ospitál, tanba ne’e Ministériu Defeza hatudu ona fatin atu harii ospitál ne’e.
“Ospitál Militár ne’e sei sai ospitál ida modernu kompleta ho kama emerjénsia própria, sala internál própria ba VIP no ba pasiente no sei fó asisténsia saúde ne’ebe adekuada”, nia realsa.
Governante ne’e hatutan ospitál ne’e sei serve ba militár sira, ba polísia sira, ba militár no polísia sira-nia família, ba veteranu sira, nomós ba públiku ein jerál.
Notísia relevante: Xina kompromete konstrui ospitál militár
Jornalista: Natalino Costa
Editora : Maria Auxiliadora