iklan

EDUKASAUN, HEADLINE

Timoroan na’in-tolu hetan bolsa estudu bá Amérika iha tinan 2024

Timoroan na’in-tolu hetan bolsa estudu bá Amérika iha tinan 2024

Diretór Ezekutivu FDCH, Júlio Aparício. Imajen Tatoli/António Daciparu

DILI, 09 janeiru 2025 (TATOLI)—Timoroan na’in-tolu hetan ona bolsa estudu bá Estadu Unidu Amérika (EUA) iha tinan 2024 nia laran hodi kontinua estudu iha nível mestradu, iha área administrasaun públiku no área tasi nian.

 “Sira na’in-tolu ida iha área administrasaun públika, ida estuda iha área tasi, ida sei tuir kursu hela ne’ebé hotu mak foin bá eskola. Sira ne’e ba nível mestradu hotu,” Diretór Ezekutivu Fundu Dezenvolvimentu Kapitál Umanu (FDCH, sigla portugés), Júlio Aparício, informa iha ninia knaar fatin, Colmera, kinta ne’e.

Bolseiru sira desloka ona iha dezembru 2024 no sei hala’o estudu durante tinan-rua. Osan ba bolseiru na’in-tolu ne’e kada tinan prevee rihun $150, ne’ebé kada tinan ema ida hetan rihun $50.

“Entaun, ami halo akordu no ita sei renova nafatin akordu nune’e ba oin ne’e ita haruka ita-nia ema ba iha ne’ebá karik oinsá kontribuisaun Amérika ne’e rasik nomós FDCH, maibé ninia kritéria mak todan oituan tanba ita-boot sira hatene kuandu ba eskola iha EUA tenke inglés tanba ne’e la’ós nível ida baibain, tenke ema ida-ne’ebé hatene lian duni, ne’e mak ami halo kooperasaun no ita kuandu tama no kompete ne’e presiza estuda maka’as duni, liu-liu iha área lian nian,” nia akresenta.

Notísia relevante : FDCH sujere ME atensaun ba ESJ hodi kompete iha bolsa estudu

Governu Timor-Leste liuhusi FDCH) no EUA liuhusi ninia Embaixada iha Timor-Leste, antes ne’e estabelese kooperasaun hodi haruka timoroan na’in-tolu ba kontinua estudu iha universidade Amérika.

Objetivu husi kooperasaun ne’e atu kontinua mantein serbisu hamutuk entre FDCH ho Embaixada EUA hodi haruka timoroan sira ba kontinua estudu.

“Objetivu husi estabelesimentu akordu kooperasaun ne’e atu kontinua mantein serbisu hamutuk entre FDCH ho Embaixada Estadu Unidu Amérika, liga ho programa dezenvolvimentu rekursu umanu, liu-liu iha bolsa estudu ba timoroan sira ne’ebé finansia ho parsiál husi FDCH hodi fó oportunidade ba joven sira, ba hala’o sira-nia estudu iha Amérika, liuhusi programa Fullbright Scholarship ne’ebé loke kada tinan. Nune’e ita haruka ona timoroan na’in-tolu ba estuda iha Amérika,” Diretór katak.

Jornalista     : Osória Marques

Editora         : Julia Chatarina

iklan
iklan

Leave a Reply

iklan
error: Content is protected !!