COVALIMA, 10 Janeiru 2025 (TATOLI) – Servisu Munisipál Edukasaun (SME) Covalima halo levantamentu dadus ba eskola 13 mak iha kondisaun aat, nune’e Ministériu Edukasaun (ME) presiza atu halo konstrusaun no reabilitasaun.
Diretora Servisu Munisipál Edukasaun Covalima, Elda de Fátima, informa katak sira aprezenta ona proposta ba Ministériu Edukasaun atu konstrui no reabilita eskola 13 ne’e. “Ita submete de’it proposta no nia orsamentu hira ita la hatene, tanba husi Ministériu Edukasaun mak tau”, Elda de Fátima dehan iha Santa Rosa, ohin.
Kona-ba bainhira mak atu konstrui no reabilita, dirijente edukasaun ne’e dehan depende ba Ministériu Edukasaun tanba eskola 13 sei hadi’a ho fazeadamente.
Eskola sira ne’ebé presiza atu hadi’a mak Eskola Bázika Sentrál (EBC) Fatululik, Eskola Bázika Filiál (EBF) 1,2 Salele, EBC Bulo, EBF Lorokida, Macous, Goronto, Aidantuik, Lakalese, Dato Rua, Koitau, Lakonak, Pelet no Halik.
Tuir dadus, totál EBC iha Covalima hamutuk 24 ho filiál hamutuk 94. Totál manorin husi Eskola Pré-eskolár, Ensinu Báziku, Ensinu Sekundáriu no Ensinu Tékniku Vokasionál ne’ebé hanorin iha Covalima hamutuk 982, husi númeru ne’e mane 589 no feto 393.
Responsavel Infraestrutura Edukativa Covalima, Florindo do Carmo, konfirma katak kondisaun eskola ne’ebé aat submete ona ba Ministériu Edukasaun atu hadi’a bazeia ba rezultadu levantamentu dadus.
“Rezultadu levantamentu dadus hatudu kondisaun eskola sira ne’ebé presiza atu hadi’a ho urjente mak EBF Halik no Dato Rua, tanba ami haree kondisaun ladún favoravel ba alunu sira atu hala’o prosesu aprendizajen”, nia informa.
Rekorde katak, iha tinan kotuk, Edukasaun Covalima implementa Projetu Konstrusaun no Reabilitasaun Infraestrutura Edukativa (PKRIE) ba eskola sia ne’ebé entrega ona proketu neen iha Dezembru 2024 no falta tolu mak seidauk.
Implementasaun projetu komunitáriu ne’e 2023 nia ne’ebé realiza fali iha 2024 mak hanesan konstrusaun no reabilitasaun ba Eskola Bázika Filiál (EBF) 1,2 Tilomar ho osan $82.859,98, Pré-eskolár Belulik Kraik $99.147,20, Pré-eskolár Ogues $96.524,37, Suai Loro $95.518,89, Tali-Oan $108.804,9, EBF Tobur $84.298 13, Eskola Bázika Sentrál Fohorem $85.228,33, Pré-Eskolár Camnasa $109.338,63 no Zulo Taz $96.098,36.
PKRIE sia ne’e ezekuta husi grupu komunitáriu ka komunidade sira ho totál orsamentu hamutuk $857.818,80.
Lembra katak Orsamentu Jerál Estadu (OJE) 2025 ba ME iha tinan ne’e hamutuk $92.383,226.
Notísia relevante: Edukasaun Covalima simu ona PKRIE neen
Jornalista: Celestina Teles
Editora: Maria Auxiliadora