iklan

HEADLINE, KAPITÁL

Google no YouTube fó rekezitu rua molok loke liras iha Timor-Leste

Google no YouTube fó rekezitu rua molok loke liras iha Timor-Leste

Sekretáriu Estadu Komunikasaun Sosiál, Expedito Loro Dias Ximenes. Imajen Tatoli/Francisco Sony

DILI, 10 janeiru 2025 (TATOLI)–Sekretáriu Estadu Komunikasaun Sosiál (SEKOMS), Expedito Loro Dias Ximenes, hateten, Google no YouTube fó ona rekezitu rua molok loke liras iha Timor-Leste.

“Espera katak fibra ótika ne’ebé Governu besik ona atu halo ligasaun husi Darwin mai Timor-Leste ne’e bele implementa lalais. Agora akordu asina tiha ona, hein fulan-juñu bele iha koneksaun ona. Se nia iha koneksaun ona mak rekezitu prinsipál husi Google no YouTube atubele loke reprezentasaun iha Timor-Leste, ida mak internet no rekezitu daruak mak literasia mediátika,” Sekretáriu Estadu informa iha salaun Prezidénsia Konsellu Ministru (PCM, sigla portugés), Palásiu Governu, sesta ne’e.

Governante ne’e dehan, presiza mós halo sensibilizasaun ba komunidade hodi utiliza internet ho saudável.

“Ida-ne’e mak agora Governu haree hela no oinsá Konsellu Imprensa atu tama-sai eskola ensinu sekundáriu sira inklui universidade atu esplika oinsá uza internet ho saudável, sosializa mediátika ne’e ba universitáriu sira atu sira kompreende hodi oinsá mak uza internet ho di’ak,” SEKOMS akresenta.

Notísia relevante : SEKOMS simu ona rekezitu husi Youtube relasiona estabelese reprezentasaun iha Timor-Leste

Sekretáriu Estadu dehan, bainhira Google  tama ona mak automátikamente rede sosiál hanesan Facebook no Tiktok iha ona reprezentasaun iha Timor.

“Agora prosesu negosiasaun la’o hela, reprezentante Governu, TIC Timor, Asosiasaun Fundasaun Hadomi Timor mós hamutuk ho SEKOMS halo prosesu hela. Content Creator ka Youtuber sira mós nafatin konsulta no halo diskusaun ho ami, ne’ebé espera katak depois fibra ótika la’o ona, ita-nia YouTube no Google bele loke reprezentasaun,” nia tenik.

Antes ne’e, Content Creator timoroan husu ba SEKOMS atu komunika ba Google no YouTube atu hamosu reprezentasaun iha Timor.

“Ami halo ona negosiasaun ho Google no YouTube iha Singapura, ne’ebé agora prosesu diskusaun la’o hela.

“Agora sira husu ne’e mak rekezitu prinsipál mak internet, ita-nia internet ne’e lais ka neineik, agora ne’e neineik. Regra kontrola, sei iha lei ida hodi halo protesaun iha ida-idak nian lei kona-ba proteje ema nia direitu,” nia katak.

Antes ne’e, Diretór Ezekutivu Ajénsia Teknolojia no Komunikasaun, Institutu Públiku (TIC Timor, I.P), Venâncio Pinto, hateten, parte Google iha Jakarta fó ona sinál di’ak tanba iha dezembru 2023 konsege hasoru malu hodi halo aprosimasaun.

Aleinde ne’e, iha dokumentu ne’ebe foin lalais Timor-Leste asina ho Indonézia, TIC Timor, I.P integra mós asuntu importante ne’e iha laran ho intensaun atubele iha dalan katak bainhira sé de’it mak prodús vídeo no hetan apresiasaun barak liu bele hetan rendimentu hosi Youtube no Google.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!