DILI, 08 maiu 2024 (TATOLI)—Sekretaria Estadu Komunikasaun Sosiál (SEKOMS) simu ona rekezitu husi Google no Youtube kona-ba pedidu estabelese Google, Youtube no Meta Platforms nia reprezentasaun iha Dili, Timor-Leste.
Inisiativa ne’e bazeia ba pedidu joven timor-oan, nune’e foin lalais ekipa SEKOMS hakat bá Jakarta (Indonézia) no Singapura hodi hasoru parte reprezentante Google no Youtube.
“Foin lalais bá Jakarta, ha’u bá liu vizita Singapura hodi halo enkontru hasoru tékniku espesialista husi Google no Youtube nian, sira fó hela esplikasaun no fó hela sira-nia proposta kritériu sira mai ita maibé ho lian inglés, agora ami sei halo tradusaun ba lian portugés no tetun hodi konvida fali kontíudu timor-oan sira atu mai atu esplika fali ba sira,” Sekretáriu Estadu Komunikasaun Sosiál, Expedito Dias Ximenes, informa iha Gabinete SEKOMS, iha Palásiu Governu, kuarta ne’e.
Notísia relevante : SEKOMS kontinua aprosima Youtube no Google hodi loke reprezentasaun iha Timor-Leste
Nia haktuir, iha kritéria barak mak presiza prienxe proposta sira ne’e, maibé pontu prinsipál liu infraestrutura telekomunikasaun no kuantidade kriadór kontíudu iha Timor-Leste inklui universidade.
“Pontu prinsipál liga internet ne’e tanba internet ne’e rasik nia kapasidade lori Youtube ne’e loke ninia reprezensaun iha Timor-Leste, iha rekezitu barak maibé ita esforsu halo enkontru iha Singapura no ami sei halo nafatin enkontru no sei konvida TIC Timor no Ministériu Transporte no Telekomunikasaun (MTK) ne’ebé hatene liu ba kestaun internet,” nia tenik.
Tuir planu fulan maiu ne’e nia rohan, sei iha konferénsia internasionál iha Singapura ne’ebé sei partisipa husi kriadór kontíudu sira husi Google no Youtube.
“Entaun Timor-Leste liuhusi SEKOMS halo hela planu atu lori mós maluk kriadór kontíudu timor-oan balu no konvida mós TIC Timor no MTK partisipa hotu eventu ne’e rasik hodi hasa’e koñesimentu,” Expedito tenik.
Jornalista : Arminda Fonseca
Editora : Julia Chatarina
