DILI, 19 fevereiru 2024 (TATOLI)—Governu liuhosi Sekretaria Estadu Komunikasaun Sosiál (SEKOMS) daudaun ne’e kontinua aprosima Google, Youtube, Limited Liability Company (LLC), no Meta Platforms atu loke reprezentasaun iha Timor-Leste.
“Ita iha faze korrespondénsia ho Youtube no Google iha Jakarta (Indonézia) no Singapura, iha tempu balun nia-laran ami sei hasoru malu hodi diskute rekezitu sira, Ita presiza prienxe atu loke sira-nia reprezentasaun iha Timor-Leste,” Sekretáriu Estadu Komunikasaun Sosiál, Expedito Dias Ximenes, informa ba Agência Tatoli, iha ninia knaar fatin, Palásiu Governu, segunda ne’e.
Notísia relevante : SECOMS sei asina akordu ho jerente Youtube iha Jakarta
Nia dehan, esforsu ne’ebé SEKOMS halo ne’e hodi responde ba ezijénsia kontíudu kreativu, plataforma online no seluk ne’ebé durante ne’e hakarak halo rejistu ba Youtube tenke ba iha ema-nia nasaun tanba Timor-Leste rasik seidauk iha reprezenasaun rede sosiál ne’e.
“Bainhira sira loke ona reprezentasaun iha Timor-Leste, maka joven timor-oan ne’ebé kreativu hakarak sai youtuber bele rejista rasik no bele hetan rendimentu balun hosi ne’e,” nia akresenta.
Antes ne’e, Diretór Ezekutivu Ajénsia Teknolojia no Komunikasaun, Institutu Públiku (TIC Timor, I.P), Venâncio Pinto, hateten, parte Google iha Jakarta fó ona sinál di’ak tanba iha dezembru 2023 konsege hasoru malu hodi halo aprosimasaun.
Aleinde ne’e, iha dokumentu ne’ebe foin lalais Timor-Leste asina ho Indonézia, TIC Timor, I.P integra mós asuntu importante ne’e iha laran ho intensaun atubele iha dalan katak bainhira sé de’it mak prodús vídeo no hetan apresiasaun barak liu bele hetan rendimentu hosi Youtube no Google.
Jornalista : Arminda Fonseca
Editora : Julia Chatarina
