SECOMS sei asina akordu ho jerente Youtube iha Jakarta
ATABAE, 12 dezembru 2023 (TATOLI) – Sekretáriu Estadu Komunikasaun Sosiál (SECOMS, sigla portugés), Expedito Dias Ximenes, sei asina akordu kooperasaun ho jerente Youtube iha Jakarta ho objetivu atu fó oportunidade ba joven sira hodi bele hatudu kreatividade bele sai youtuber ne’ebé atu hetan rendimentu.
“Agora daudaun ami atu halo akordu ho sentru Youtube iha Jakarta, Singapura no Englaterra atu nune’e sira bele loke sira-nia ramu Youtube iha ita -nia rai hodi fó oportunidade ba ita-nia joven sira hodi hetan osan uituan”, Expedito Dias Ximenes hateten ba jornalista sira hafoin oradór ba formadu 300-resin ne’ebé tuir formasaun ba prevensaun konflitu komunitáriu iha Rai Robo, Postu Administrativu Atabe, Munisípiu Bobonaro, tersa ne’e.
Nia dehan, joven barak ladún hetan oportunidade atu espresa sira kriatividade ne’ebé sira iha, tanba ne’e, SECOMS iha kompromisu atu ajuda joven sira hodi bele hetan oinsá atu hetan osan.
Governante ne’e dehan, SEKOMS tau ona planu atu ba koalia uluk ho jerente Youtube iha Jakarta atu estabelese Youtube iha Timor-Leste, nune’e fó oportundade ba joven timoroan atu hetan osan hosi youtube.
“Ita atu sai Youtuber ne’e seidauk bele tanba ninia server ne’e seidauk instala iha ita nian rai, sei instala iha ema nia rai ne’ebá, tanba ne’e ami sei halo akordu ida ho jerente Youtube iha Jakarta atu esbalese server youtube ida ita-nia rai”, nia dehan.
“Atu ita-nia joven sira bele hatudu sira-nian kriatividade hodi bele prodús filme badak ho saudável atu sosiedade bele simu no sira mós bele hetan osan hosi ida-ne’e”, nia adianta.
Nia husu ba joven sira katak kuandu Youtube estabelese ona iha Timor-Leste mak joven sira tenke prodús filme badak ne’ebé edukativu atu fó informasaun ne’ebé edukativu.
“Labele prodús informasaun ne’ebé la saudavél, se nune’e Youtube sei la autoriza no sei taka imi nia kanál no imi sei la hetan osan”, nia konklui.
Jornalista: Natalino Costa
Editór : Zezito Silva
