iklan

EKONOMIA, HEADLINE

Governu planeia halo teste ba fibra ótika ligasaun internasionál iha fevereiru 2025

Governu planeia halo teste ba fibra ótika ligasaun internasionál iha fevereiru 2025

Diretór Nasionál Infraestrutura no Komunikasaun iha MTK, Ambrosio Amaral. Imajen Tatoli/Francisco Sony

DILI, 10 janeiru 2025 (TATOLI)–Diretór Nasionál Infraestrutura no Komunikasaun iha Ministériu Transporte no Komunikasaun (MTK), Ambrosio Amaral, informa, Governu hamutuk ho Alcatel Submarine Networks (ASN) tuir planu iha fevereiru 2025 sei halo teste ba kabu submarinu fibra ótika (ligasaun internasionál) iha cable landing station, Bebonuk-Dili.

“Fibra ótika ne’e dada husi Timor-Leste bá Austrália no nia instalasaun finál iha loron 04 setembru 2024. Diresaun Nasionál Infraestrutura no Komunikasaun (DNIK) iha loron hirak liubá, tékniku na’in-rua maihusi Fransa husi ASN, bá iha fatin instalasaun cable landing station Bebonuk halo preparasaun atu halo teste, ne’ebé tuir planu iha inísiu fevereiru Governu hamutuk ASN no empreza VOCOS halo teste ba kabu no konesaun ba portél,” Diretór ne’e hato’o ba Agência Tatoli, iha Palásiu Governu, sesta ne’e.

Notisia relevante : Empreza ASN konklui instalasaun repetidór hitu ba fibra ótika kabu submarinu

Nia dehan, instalasaun ida presiza halo teste nune’e bele hatene no haree liña internet la’o di’ak tanba durasaun ba teste ne’e durante fulan-rua ka tolu.

“Bainhira haree loos mak sei entrega ba empreza ne’ebé atu kaer bele fa’an ba públiku,” nia akresenta.

Kooperasaun lubuk ida mak Governu liuhusi MTK no empreza VOCOS halo ona. Iha loron 12 dezembru 2024,  Ministru Transporte no Komunikasaun, Miguel Manetelo asina ona kontratu ho empreza VOCOS relasiona ho kabu submarinu ne’e durante tinan-17.

“Daudaun ita hein hela polítika Governu oinsá atu estabelese empreza estatál ida atu jere kabu submarinu, prosesu ne’e la’o hela, hein lori bá aprezenta iha Konsellu Ministru hodi aprova,” nia tenik.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!