COVALIMA, 10 Janeiru 2025 (TATOLI) – Rezultadu avaliasaun husi Servisu Saúde Covalima hatudu katak inan isin-rua hamutuk 165 mak partu de’it iha uma durante tinan 2024, informa Diretór Saúde Covalima, Domingos Sequeira.
“Ohin halo aprezentasaun ne’ebé ita akompana rezultadu hatudu katak inan isin-rua 9%, ekivalente ba númeru 165 mak deside partu iha uma no la bá iha sentru no postu saúde ne’ebé Ministériu Saúde kria ona iha postu administrativu hitu”, Domingos Sequeira informa iha Salaun Polo, ohin.
Razaun iha 2024 inan isin-rua partu de’it iha uma, tanba haree ba kondisaun estrada aat no halo sira difísil atu hakat bá instalasaun saúde sira.
Tanba ne’e, hanesan dirijente husi Servisu Saúde Covalima esforsu hodi halo koordenasaun ho xefe sentru saúde sira atu haree dezafiu ne’ebé enfrenta, nune’e iha 2025 bele hadi’ak liután.
Nia relata katak difikuldade balun ne’ebé sentru saúde sira enfrenta maka iha de’it karreta ambulánsia multifunsaun ida, ne’ebé apoia ba programa hotu ne’ebé sentru saúde sira hala’o.
“Ita tau ona iha planu ba ita-nia inan isin-rua sira, maibé de repende bebé moris ona iha uma. Ita esforsu atu iha 2025 halo edukasaun no promosaun saúde ne’ebé apoia husi grupu suporta inan”, nia realsa.
Tuir dadus, iha 2023, inan isin-rua ne’ebé partu iha instalasaun saúde hamutuk 605 no iha 2024 hamutuk 558. Aleinde ne’e, iha 2023, rejista inan isin-rua ne’ebé partu iha uma hamutuk 91.
Domingos Sequeira relata katak pesoál saúde ne’ebé presta serbisu iha Saúde Covalima hamutuk 300, husi númeru ne’e funsionáriu públiku na’in-173 no kontratadu 127.
Reprezentante Prezidente Autoridade Munisípiu Covalima, Filomeno Cardoso, dehan haree ba rezultadu avaliasaun ba inan isin-rua ne’ebé deside partu iha uma duké iha instalasaun saúde sira ne’e parte Saúde presiza hadi’a iha tinan ne’e.
“Ita hatene katak foin lalais halo ona lansamentu ba programa planeamentu familiár tinan tolu oan ida, ne’ebé ha’u rasik mak partisipa iha atividade ne’e”, nia dehan.
Notísia relevante: MS halo advokasia kona-ba Programa Planeamentu Familiár iha Covalima
Jornalista: Celestina Teles
Editora: Maria Auxiliadora
