DILI, 10 janeiru 2025 (TATOLI)—Komisaun G trata asuntu Edukasaun, Juventude, Desportu no Kultura iha Parlamentu Nasionál (PN), sesta ne’e, rona preparasaun Ministériu Juventude Desportu Arte no Kultura (MJDAK) nian atu realiza jogu CPLP iha Timor-Leste.
Notísia Relevante: Komisaun G husu Governu halo preparasaun másimu realiza jogu CPLP
Iha kinta (09 janeiru 2025), Ministru Juventude, Desportu, Arte no Kultura (MJDAK), Nélio Isaac Sarmento no Sekretária Estadu ba Arte no Kultura (SEAK), Jorge Soares Cristovão, hala’o sorumutu ho Deputadu sira husi Komisaun G iha salaun MJDAK Lecidere, Dili.
Prezidente Komisaun G, Armando dos Santos Lopes, hateten reuniaun ne’e ko’alia liu kona-ba asuntu importante balun ho MJDAK no SEAK ba dezáfiu saida mak sira hasoru durante iha tinan 2024 no estratéjia prinsipál saida mak sira atu rezolve iha 2025 ne’e.
Komisaun G mós fó apresiasaun ba SEAK-MJDAK, ho eventu festivál fronteira 2023 no festivál fronteira 2024, ne’ebé mak hala’o tiha ona iha munisípiu Bobonaro no Oé-Cusse atu promove nafatin rekonsiliasaun entre Timor-Leste ho Indonézia.
Aleinde ne’e, durante sorumutu ko’alia mós kona-ba preparasaun jogu CPLP, ne’ebé iha atleta por volta 106, ne’ebé sei mai iha Timor-Leste, no nia akompaña atleta sira por-volta rihun resin.
“Ne’ebé, ho Timor kapitál Dili ida-ne’ebé kiik-oan, ami husu atu fó informasaun kona-ba alojamentu, transporte, saúde, seguransa, infraestrutura, no hirak ne’e ita atu prepara para ba hasoru jogu CPLP nian. Aleinde jogu CPLP, prepara mós ba jogu SEA-Games ne’ebé atu mai daudaun,” Prezidente Komisaun G, Armando Lopez, hateten liuhusi nota ne’ebé Tatoli, asesu, sesta ne’e.
Nia dehan, eventu ne’e hanesan jogu internasionál atu lori Timor-Leste ba mundu, tanba ne’e husu ministériu relevante atu hala’o preparasaun másimu hodi realiza eventu ne’e ho susesu.
Jornalista : Nelson de Sousa
Editór : Cancio Ximenes