iklan

OEKUSI

Ministériu Saúde orienta autoridade Pante Makasar implementa Programa ALFA

Ministériu Saúde orienta autoridade Pante Makasar implementa Programa ALFA

Ministériu Saúde, liuhusi Departamentu Vijilánsia Sanitária no Saúde Ambientál, realiza enkontru ho xefe suku no aldeia sira husi sub-rejiaun Pante Makasar. Foto Tatoli/Abílio Elo Nini

OÉ-CUSSE, 10 Janeiru 2025 (TATOLI) – Ministériu Saúde (MS), liuhusi Departamentu Vijilánsia Sanitária no Saúde Ambientál, realiza enkontru ho xefe suku no aldeia sira husi sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA), hodi orienta sira atu implementa programa Área La So’e Fo’er Boot Arbiru (ALFA) hodi prevene aan husi moras.

“Tanba tinan hirak liubá ita halo ona orientasaun ba munisípiu hotu. Ohin ne’e, ita halo reorientasaun ba planu asaun komunitária ba saneamentu no ijiene. Ita orienta fali karik seidauk implementa so’e fo’er arbiru no la muda hahalok, entaun liuhusi konvokatóriu sira iha nivel munisípiu, postu to’o suku no aldeia atu motiva komunidade atu iha obrigasaun hodi uza saneamentu báziku, liuliu sintina”, Xefe Departamentu Vijilánsia Sanitáriu no Saúde Ambientál iha Ministériu Saúde, Elizário Soares Lopes, iha Oé-Cusse, ohin.

Tuir Sensu Populasaun 2022, saneamentu nasionál iha área urbana atinje ona 98% no iha rurál foin 80%, tanba ne’e ho reorientasaun sira hanesan ne’e atu muda hahalok, katak uma-kain foun ida tenke harii netik sintina.

Notísia relevante: Saneamentu bázika iha RAEOA atinje 74%

“Tanba impaktu husi laiha sintina mak akontese moras oioin hanesan diareia afeta ba labarik sira, má nutrisaun sa’e, moras kulit, ISPA, me’ar no iis-boot, inklui moras hada’et seluk hanesan epatite, liuhusi ema so’e fo’er boot arbiru tanba ambiente la saudavel”, nia dehan.

Iha sorin seluk, Sekretáriu Rejionál ba Asuntu Saúde, Luís de Jesus Neno, realsa liuhusi enkontru bele reorientaa autoridade sira, tanba agora tempu udan, nune’e bele prevene komunidade husi moras ne’ebé bele mosu hanesan diareia no dengue.

“Tan ne’e importante konsome ai-han ne’ebé moos, fatin sira tenke limpeza moos, liuliu so’e fo’er boot iha nia fatin, tanba Oé-Cusse to’o ohin loron ita seidauk iha suku ka aldeia ida deklara ona husi ALFA”, nia salienta.

Nia espera liuhusi reorientasaun ne’e, xefe suku no aldeia sira kontinua partilla informasaun ba komunidade iha nivel suku no aldeia hodi halo preparasaun, katak muda halalok so’e fo’er boot arbiru no hamoos ambiente uma hela fatin.

Notísia relevante: Implementasaun ZEESM kontribui ba mudansa liña pobreza iha RAEOA

Tuir dadus husi Departamentu Vijilánsia Sanitária no Saúde Ambientál, iha munisípiu neen mak daudaun ne’e deklara ona ALFA mak hanesan Aileu, Ainaro, Bobonaro, Liquiçá, Manufahi no Ermera.

Jornalista: Abílio Elo Nini

Editora: Maria Auxiliadora

iklan
iklan

Leave a Reply

iklan
error: Content is protected !!